Форвард марқұмның отбасына қайғырып көңіл айтты. Ол болған жағдайды трагедия деп санайды.
"Үлкен қасірет. Айтарға сөзім жоқ... Отбасына барынша қолдау білдіремін. Жаны жәннатта болсын", - деді Роналду.
30 жастағы футболшының қазасы тек Роналдуды емес, бүкіл футбол әлемін есеңгіретіп тастады. Марқұмның отбасына Лионель Месси, Ламин Ямаль, Винисиус Жуниор, Килиан Мбаппе және өзге де ойыншылар көңіл айтты.
Скриншот: Instagram
Испаниялық футболшының қазасы: не белгілі?
Еске салайық, оқиға Испанияның екінші дивизионындағы "Тенерифе" және "Андорра" кездесуінің 95-минутында болған еді. Есеп 2:2 болып тұрған сәтте Хесус де Мигель қақпашы Хесус Овоноге қарсы шыққан болатын, ал қақпашы оны тоқтатпақ болады. Алайда бұл әрекет ереже бұзумен аяқталды, қақпашы шабуылшының кеудесінен тізесімен соққан.
Осыдан кейін Хесус де Мигель алаңға құлап, өзі тұра алмаған. Алаңға медициналық қызметкерлер шақырылып, футболшыға көмек көрсетуге тура келді.
Қақпашы ереже бұзғаны үшін қызыл қағаз алды, ал төреші матчті соңына дейін жеткізбеу туралы шешім қабылдады.
وفاة لاعب نادي تينيريفي الإسباني خيسوس دي ميغيل إثر تعرضه لتدخل عنيف خلال مباراة في الدوري الاسباني الدرجة الثانية. https://t.co/DBrrhV4u0H
— hodannat (@hodannat55) November 3, 2026
Келесі күні клуб жедел медициналық көмек көрсетілгеніне қарамастан, ойыншыны аман алып қалу мүмкін болмағанын, ол қайтыс болғанын хабарлады.
Осыдан кейін қақпашы Хесус Овононың әлеуметтік желілердегі парақшаларына балағат сөздер қарша борады. Көбі оны де Мигельдің өліміне кінәлап, түрмеге жабуды талап етті. Футболшы Instagram-дағы парақшасында осы жағдайға қатысты жазбасынан бөлек барлық жазбаны өшіріп тастады.
"Кеше алаңда болған жағдайдан есеңгіреп қалдым. Жай ғана кезекті футбол матчі болуға тиіс ойын өмірімнің соңына дейін жадымда қалатын қасіретке айналды.
Ешқашан ешкімге зақым келтіруді ойламағанымды бәрі білгенін қалаймын. Бұл жантүршігерлік жазатайым оқиға болды. Қазіргі ішімдегі кінә сезімі мен қасіретті ешқандай сөзбен жеткізу мүмкін емес.
Оның отбасына, достарына, командаластарына және оны жақсы көрген жандардың бәріне қайғырып көңіл айтамын. Футбол мен үшін бәрінен қымбат, бірақ ешқандай ойын, ешқандай жеңіс немесе бәсеке адам өміріне тұрмайды. Шын жүректен өкінемін. Мұны өмір бойы арқалап өтемін. Бақұл бол", - деді ол.