Бұл туралы сәрсенбі, 4 қарашада Қазақстан теннис федерациясының баспасөз қызметі мәлімдеді.
Әлемдік рейтингте 473-орында тұрған Құламбаева алғашқы айналымда WTA рейтингінің 282-сатысындағы Жапония өкілі Мэй Ямагучимен кездесті.
Қарсыласының рейтингтегі орны жоғары болғанына қарамастан, қазақстандық спортшы 6:4, 7:5 есебімен екі сетте жеңіске жетті. Кездесу 2 сағат 1 минутқа созылды.
Матч барысында қазақстандық теннисші доп қабылдауда сенімді ойын көрсетіп, қарсыласының екінші соққысындағы ұпайлардың 62 пайызын иеленді және он брейк-пойнттың жетеуін сәтті пайдаланды. Сонымен қатар Құламбаева 150 ұпай сарапқа салынған ойынның 83-інде жеңіске жетті, бұл жалпы ұпай санының 55 пайызын құрайды.
Қазақстан спортшысы жарыстың негізгі кезеңіне іріктеу арқылы өтіп, енді ширек финалға жолдама алу үшін күресті жалғастырады.
Екінші айналымда ол жапониялық Моюка Учижима мен турнирдің үшінші нөмірлі ракеткасы, польшалық Магда Линетт арасындағы кездесудің жеңімпазымен кездеседі.
Еске сала кетейік, бұған дейін Құламбаева Португалияның Калдаш-да-Раинья қаласында өткен WTA 125 санатындағы турнирдің жұптық сынында жеңімпаз атанған болатын. Шешуші матчте аустралиялық Габриэлла Да Силва Фикпен бірге ол 4:1 есебімен Рутуя Бхосале (Үндістан) / Елена Мицич (Аустралия) жұбынан басым түсті.
Әлеуметтік желілердегі парақшаларымызға жазылыңыз: Telegram және Instagram.
Бізге қосылыңыз және ең маңызды жаңалықтардан хабардар болыңыз!