АФК мәлімдемесіне сәйкес құрлықтың басты футбол турнирінің кезекті маусымы бастапқыда 2027 жылғы 7 қаңтар мен 5 ақпан аралығына жоспарланған болатын, енді ол 2027 жылғы 23 желтоқсан мен 2028 жылғы 21 қаңтар аралығында өтеді.
"Азия Кубогының ұйымдастыру комитеті аймақтағы жағдай өршуіне байланысты туындаған төтенше жағдайларға, соның ішінде логистикалық қиындықтар мен көлік қатынасындағы үзілістерге байланысты ұлттық құрамалардың басты турнирін ауыстыруды мақұлдады. Турнир өткізілетін жаңа уақыт ФИФА-ның бекітуіне ұсынылады.
Қалыптасқан жағдайда турнирді бастапқы белгіленген мерзімде ұйымдастыру және өткізу айтарлықтай қиындады. Сондықтан барлық қатысушы командалардың, ресми тұлғалардың, көрерменнің және өзге де мүдделі тараптардың жағдайын ескеріп, жарыс мерзімін өзгерту қажет болды", - деп жазылған мәлімдемеде.
Айта кетейік, қазанның басында Эр-Рияд әуежайына зымыран шабуылы жасалған болатын. БАҚ мәліметінше, салдарынан шамамен 12 адам қаза тауып, 300-ден аса адам жарақат алған.
Шабуылды Йеменнің солтүстігін басқаратын шииттік "Аңсар Алла" қозғалысының өкілдері (хуситтер) өз мойнына алды. Әуежай алғашқы шабуылдан кейін қалпына келтіріле салысымен, олар нысанға қайта соққы жасалғанын мәлімдеді.
Соған қарамастан Эр-Риядта ірі спорттық іс-шаралар жалғасып жатыр. Жақында ғана онда қазақстандық Бек Нұрмағанбет қатысқан Канело – Мбилли бокс кеші өтті.
Қазақстан құрамасы Азия чемпионатына қатыса ма?
Еске салайық, Қазақстан футбол құрамасы Азия жарыстарына қатыспайды. 2002 жылы Қазақстан футбол федерациясы Азия футбол конфедерациясынан (АФК) Еуропа футбол қауымдастықтары одағына (УЕФА) ауысты. Содан бері ұлттық құрама Еуропа командаларымен бірге өнер көрсетеді.
Мерзімі шегерілген Азия кубогына Қазақстанмен көршілес Өзбекстан, Қырғызстан және Қытай құрамалары қатысады.
Азия чемпионатының кейінгі екі маусымында Қатар командасы жеңіске жетті.