Тағы бір бала ауруханаға түсті
Елшілік мәліметінше, 2 қараша күні кешке Ташкенттің жұқпалы аурулар ауруханасына тағы бір бала жатқызылған. Осылайша, ауруханаға түскен қазақстандықтардың жалпы саны 18 адамға жетті. Олардың арасында 12 бала және алты ересек адам бар.
3 қарашадағы жағдай бойынша, емдеу курсынан кейін денсаулығы жақсарған 10 пациент - алты бала мен төрт ересек адам ауруханадан шығарылды.
Қазақстанның тағы сегіз азаматы - алты бала мен екі ересек адам Ташкенттің медициналық мекемелерінде қалып отыр. Олардың жағдайы тұрақты деп бағаланған, барлық пациент қажетті көмек алып, дәрігерлердің бақылауында.
13 қазақстандық отанына оралды
Елшіліктің қолдауымен Қазақстанның 13 азаматы үйлеріне қайтты.
"Осылайша, спорттық жарыстарға қатысу үшін Ташкентке келген Қазақстан Республикасының 95 азаматының 12-сі Өзбекстан аумағында қалып отыр (оның сегізі емделуді жалғастырып жатыр)", - делінген хабарламада.
Қазақстандық футболшыларға не болды?
Еске сала кетейік, Ташкенттегі Dostlik Cup 2026 футбол турниріне қатысушылардың жаппай денсаулығы сыр бергені туралы 1 қарашада белгілі болды. Турнирге Қазақстан, Қырғызстан және Өзбекстаннан келген командалар қатысқан. Қарағанды облысының намысын үш жекеменшік футбол мектебінің тәрбиеленушілері қорғады.
Қарағандылық футбол командасы қатысушыларының ата-аналарының айтуынша, балалар 31 қазан күні қонақүйде таңғы ас ішкеннен кейін өздерін жайсыз сезінген. Жас футболшылардың іші ауырып, дене қызуы көтерілген. Кейбіріне тамшылатқыш салу қажет болды. Ата-аналар мұның себебі тағамнан улану болуы мүмкін деп болжайды.
Кейінірек Қазақстанның Өзбекстандағы елшілігі 19 адамның медициналық көмекке жүгінгенін, оның 17-сі ауруханаға жатқызылғанын хабарлады.
Тағы оқыңыз: Ташкентте жас футболшылар уланды: Қазақстандағы ауруханаларда төсек-орын дайындалды