“Ешқашан кеш емес“: астаналық 80 жастағы желаяқ ОАР-дағы марафонды жүгіріп өтті

Астаналық 80 жастағы марафоншы Салтанат Түйтебаев Кейптаундағы (ОАР) 42 шақырымдық бәйгені аяқтап, елге оралды. Tengri Sport тілшісіне берген сұхбатында ол жарыстан алған әсерлерін бөлісіп, отбасы туралы айтып берді.

Салтанат Түйтебаевтың Кейптаунда (ОАР) 42,2 шақырымдық марафонды жүгіріп өткені туралы жаңалық қазақстандықтарды тәнті етті. Жүгіруге барлығы 7 сағат 31 минут уақыт кеткен, алған жарақатына қарамастан, ол мәреге сәтті жетті. Жүгіруші елге оралған соң оны елорда әуежайында құрметпен қарсы алды.

Айта кетейік, өткен жылы ол 80–89 жас аралығындағы санатта Нью-Йорк марафонының чемпионы атанған болатын.

Салтанат Түйтебаев бұл қашықтықты 4 сағат 45 минутта бағындырып, елге алтын медальмен оралды.

Tengri Sport тілшісі атақты қазақстандық марафоншымен тілдесті. Сұхбат кезінде 80 жастағы желаяқ мәре сызығын қиған сәттегі тебіренісімен бөлісті.

"Нью-Йорк марафонынан немесе 15 мың, 20 мың адам қатысатын басқа да жарыстардан кейін, ал бұл жолы 59 мың адам болды, нәтижеңді тек белгілі бір уақыттан кейін ғана білесің. Кейде бәрі жүгіріп болғанша 2-3 сағат күтуге тура келеді. Сондықтан сол сәтте қандай сезімде болғанымды айта алмаймын. Бірақ келесі күні қуанышым қойныма сыймады", - деді Салтанат ақсақал.

Салтанат Түйтебаевтың жеке мұрағатынан алынған фото

Мұндай жүктемелер тіпті жас жүгірушілердің өзіне қатты әсер етеді және қалпына келу кезеңінде ерекше күтімді қажет етеді, ал егде жастағы марафоншылар туралы айтпаса да түсінікті. Алайда, 80 жастағы отандасымыздың айтуынша, оған қатарға қосылу үшін небәрі екі күн жеткілікті болған.

Ол сондай-ақ денсаулығында кінәрат болмағанын, бірақ жарақаттан қашып құтыла алмағанын айтты.

"2-3 күн тынығып, қалпыма келдім. Денсаулығымда ешқашан айтарлықтай мәселе болған емес, бірақ жарақаттар болды. Олар марафоншының серігі іспетті. Жарақатсыз мүмкін емес", - деді желаяқ.

Салтанат ақсақал кейде ағзасы сыр берсе де, күн сайын күресуді және өз жолын жалғастыруды таңдайтынын айтады.

- Ағзаның абай болу керектігін ескертетін кездері болады. Ал оған құлақ асу-аспау – әр спортшының өз еркі.

- Ал көптеген дәрігердің белгілі бір жастан кейін жүктемені азайту туралы кеңесіне қалай қарайсыз?

- Олар бұл мәселені түсінбейді, өйткені өздері жүгірмейді.

Салтанат Түйтебаевтың жеке мұрағатынан алынған фото

Балалары мен немерелерінің қарт марафоншының бұл әуестігіне көзқарасы туралы сұраққа Салтанат отбасының өзін мақтан тұтатынын, бірақ олардың да спорттағы жетістіктері одан кем емес екенін жеткізді.

"Балаларым мен немерелерім, әрине, мақтан тұтады, бірақ өздері де спортпен айналысады. Көбі жоғары нәтижелерге қол жеткізген. Кенже қызым – шахматтан халықаралық шебер. Немерем – футболдан спорт шеберіне кандидат, Қазақстан құрамасының мүшесі болған. Шөберем жақында ғана Фрунзеден (қазіргі Бішкек) келді. Көркем гимнастикадан Азия чемпионатының күміс жүлдегері атанды", - дейді атлет.

80 жастағы марафоншының немересі Әнел Елеусізова бұған дейін Қазақстанның жасөспірімдер мен жастар құрамасының сапында болған. Студенттер арасындағы футзалдан әлем чемпионатына қатысқан.

Кейінірек ол үлкен футболда ("Жеңіс") және футзалда ("Астана", "Альянс") кәсіби клубтар намысын қорғаған.

Қазір ол "Жеңіс" футбол клубының қыздар тобында жаттықтырушы болып қызмет етеді.

Марафоншының шөбересіне келсек, Сабина Түйтебаева көркем гимнастикамен айналысады және Қазақстан құрамасы сапында өнер көрсетеді.

Оның соңғы марапаты – 2026 жылы Бішкекте (Қырғызстан) өткен Азия чемпионатында иеленген 2 күміс медаль.

Салтанат жүгірумен айналысу ешқашан кеш емес және тіпті егде жаста да марафондарға қатысуға болады деп санайды.

"Ешқашан кеш болмайды. Ешқашан. Егер адам жарысқысы келсе, ол қатысады. Барлық жағдай жасалған. Өйткені барлық жарыстарда қатысушылар жас ерекшелігіне қарай бөлінеді", - деді желаяқ.

Жас буынға кеңес беру туралы өтінішке Салтанат Түйтебаев денсаулықты күту, спортпен айналысу және бақытты өмір сүруден басқа айтар ақылым жоқ деді.

Оның пайымдауынша, жаңа буын алдыңғы толқынға қарағанда әлдеқайда ақылды және не істеу керектігін өздері-ақ біледі.

"Мен қандай ақыл айта аламын? Олар қазір менен әлдеқайда ақылды, сондықтан менің ақылымды қабылдай қоймас. Дендерің сау болсын, бақытты өмір сүріңдер. Спортпен шұғылданыңдар", - деп түйіндеді марафоншы.

Салтанат Түйтебаевтың жеке мұрағатынан алынған фото