Еуропалық Әлем кубогінің жүлдегері Қазақстан атынан өнер көрсету ниеті туралы айтты

Фото: instagram.com/sean_niewold/

Нидерландық жүзуші Шон Ниволд Tengri Sport тілшісіне берген сұхбатында Қазақстан құрамасы сапында өнер көрсетуге ниеті және бұл жоспар неге әзірге жүзеге аспайтыны туралы айтып берді.

24 жастағы нидерландық спортшының Қазақстанмен байланысы бар. Біраз уақыт бұрын ол анасының Отанына оралу мәселесін қарастырған болатын. Дегенмен, Астанада өтіп жатқан Әлем кубогіне ол әзірге Нидерланд құрамасы көшбасшыларының бірі ретінде келді.

– Қазір Қазақстаннан, Астанадан қандай әсер алып жатырсыз?

– Бәрі маған жанкүйер болып жатыр, бұл қолдауды анық сезінемін. Мен Қазақстанды қатты жақсы көремін. Көптеген қалада болдым: Атырауда, Алматыда, Астанада – барлық жерде. Біз мұнда жиі келеміз, сондықтан Қазақстанға бірінші рет келуім емес. Мен осындамын, өйткені бұл – менің үйім.

– Болашақта Қазақстан құрамасы сапында өнер көрсету туралы ойыңыз әлі де бар ма, әлде бұл мәселеге нүкте қойылды ма?

– Менде тек Нидерланд паспорты ғана бар, сондықтан Қазақстан атынан жарыстарға қатыса алмаймын. Қалар едім, бірақ бұл мүмкін емес. Өкінішті, бірақ солай.

– Бір кездері қазақша бірнеше сөз болса да үйренгім келеді деп едіңіз, бұл бағытта алға жылжу бар ма?

– Иә, кейбір сөздерді үйреніп алдым, бірақ оларды келесі жолға сақтай тұрамын.

Айта кетейік, жүзуден Қазақстан құрамасының жаттықтырушысы Илья Гусаков Tengri Sport тілшісіне берген сұхбатында Ниволдты натурализациялау мәселесіне қатысты пікір білдірген болатын. Тәлімгердің айтуынша, ешкім осындай деңгейдегі спортшы үшін де арнайы жағдай жасап, икемделмейді.

– Жақында нидерландық Шон Ниволд батыл қадам жасап, Қазақстан паспортын алса, біздің құрамада өнер көрсетуі мүмкін деген қауесет шықты, солай ма?

– Иә, натурализация өте күрделі мәселе. Менің жеке ұстанымым: біз ешкімді шақырмаймыз, яғни өз құрамамызда өз спортшыларымыздың жүзгенін жөн көреміз. Бірақ егер біреу бізге өзі келсе, әрине, ешкімді қумаймыз, - деп атап өтті жаттықтырушы.

Шон Ниволд деген кім және оның Қазақстанмен қандай байланысы бар?

Нидерландтың 24 жастағы тумасының анасы Эльмира Атырауда дүниеге келген. Шонның әкесімен ол Қазақстанда жұмыс істеп жүргенде танысқан.

Ниволд Нидерландта дүниеге келсе де, ол қазақ әндерін тыңдайды, Қазақстан нышандары бар киімдер киеді және ет, қазы мен бауырсақты жақсы көреді. Бұл туралы ол әлеуметтік желілерде жиі бөліседі.

Шонның спорттық нәтижелеріне келер болсақ, ол Еуропа чемпионатында бірнеше медаль жеңіп алып, Париждегі Олимпиада ойындарына қатысып үлгерді. Астанадағы Әлем кубогі кезеңінде ол 100 метрге еркін жүзуден қола жүлдені иеленді.