ФИФА Ұлттар лигасы аяқталғаннан кейін Қазақстан құрамасына қатысты шешім қабылдады

Фото: TengriNews.kz/Әлімжан Аманжол

Футболдан Қазақстан құрамасы Ұлттар лигасының қорытынды матчінен кейін ФИФА рейтингісінде тағы екі саты төмендеп, 119-орынға тұрақтады, деп хабарлайды Tengri Sport.

Ұлттар лигасы топтық кезеңінің соңғы матчінде Қазақстан командасы Словакия құрамасымен 2:2 есебімен тең түсті. Жалпы алты матчтің қорытындысы бойынша құрама үш рет тең ойнап, үш рет жеңіліске ұшырады. Бірде-бір жеңіске жетпеген команда топта соңғы орынды иеленді.

Бұл нәтиже Қазақстанның әлемдік рейтингтегі орнына әсер етті: команда 117-орыннан 119-сатыға сырғып, енді Мавритания мен Гвинея-Бисау арасында орналасқан.

Айта кетейік, Қазақстан құрамасы тарихындағы ең жоғарғы көрсеткіш 2016 жылғы 83-орын болса, ең төменгі нәтиже - әлемдік футболдағы жеке жолын бастаған кездегі 166-орын (1996 жыл).

ФИФА рейтингі: көшбасшылар мен өзгерістер

Еске сала кетейік, Испания құрамасының жеңісті сериясы ағылшындармен ойында үзілгеніне қарамастан, олар рейтинг көшбасшысы болып қала берді.

Сонымен қатар Португалия құрамасының орны өзгеріп, алтыншы сатыға төмендеді, ал Марокко командасы бесінші орынға көтерілді.

  • 1. Испания - 2 004,48 ұпай;
  • 2. Аргентина - 1 964,95;
  • 3. Франция - 1 950,82;
  • 4. Англия - 1 938,90;
  • 5. Марокко - 1 805,34;
  • 6. Бразилия - 1 800,36;
  • 7. Португалия - 1 797,60;
  • 8. Бельгия - 1 790,37;
  • 9. Нидерланды - 1 782,43;
  • 10. Колумбия - 1 738,36;
  • ......
  • 117. Эстония - 1164,58;
  • 118. Мавритания - 1161,77;
  • 119. Қазақстан - 1160,72;
  • 120. Гвинея-Бисау - 1159.01.

Қазақстан құрамасына жаңа бапкер келеді

Еске сала кетейік, Словакиямен тең ойыннан кейінгі күні ҚФФ бас хатшысы Скотт Манн федерацияның нидерландылық маман Джон ван ’т Схиппен келісімшартты ұзартпайтынын мәлімдеді. Ол Ұлттар лигасында ұлттық құрамаға жетекшілік еткен болатын.

Федерация қазірдің өзінде жаңа тәлімгер іздестіруге кірісті және басымдық қазақстандық бапкерге берілетінін мәлімдеді.

“Қазақстандық маман басымдыққа ие болады“: ҚФФ жаңа бапкер іздеуге кірісті

Пікірлер