“Қазақстандық маман басымдыққа ие болады“: ҚФФ жаңа бапкер іздеуге кірісті

Фото: TengriNews.kz/Әлімжан АманжолФото: TengriNews.kz/Әлімжан Аманжол

Қазақстан футбол федерациясының бас хатшысы Скотт Манн баспасөз мәслихатында ұлттық құраманың жаңа бапкерін іздеу кезінде жергілікті мамандарға басымдық берілетінін айтты, деп хабарлайды Tengri Sport.

17 қарашада Скотт Манн ұлттық құрама бапкері Джон ван ’т Схиппен келісімшарт ұзартылмайтынын және ҚФФ жаңа тәлімгер іздеуге кіріскенін хабарлады.

Журналистермен тілдесу барысында функционер болашақ бапкер қандай болуы керек екеніне бірнеше рет тоқталды.

"Бізге ойыншылардың менталитетіне сай келетін, біз ойнағымыз келетін футбол стиліне сәйкес келетін және бастапқы кезеңде үлкен жұмыс атқаруға дайын бапкер табу керек", - деді Манн.

Сонымен қатар Манн болашақ бапкердің жастармен жұмыс істей білуі маңызды екенін атап өтті.

"Біздің пайымдауымызша, қазір құрамада мансабын аяқтауға жақындаған бірқатар футболшы бар. Олар ұлттық құраманың үздік ойыншылары болды, бірақ олардың бізге көздеген деңгейге жетуге көмектесуі қиын болады. Біз кейбір жас футболшыларға көбірек ойын уақытын беруіміз керек. Әйтпесе, әлемдік рейтингтің 110–120-орындарының маңайында қалып қоямыз", - деді ол.

Басымдық - қазақстандықтарда

Бас хатшы журналистермен сұхбатында жаңа бапкердің жалақысы мәселесіне де тоқталды. Оның айтуынша, бұған дейінгі екі маман - Байсуфинов пен ван ’т Схип бірдей жалақы алған, бірақ бұл федерация мүмкіндіктері шеңберінде болған.

"Сол сәтте (Джон ван ’т Схипті тағайындау кезінде) күмәнді мақсаттарды көздемейтін, ұзақ мерзімді перспективасы бар жергілікті бапкер немесе маман болмағаны анық еді. Мен мұнда әртүрлі ұсыныс естідім. Мысалы, Әлем чемпионатынан кейін бірден менен неге Марокко құрамасының бас бапкерін шақырмасқа деп сұрады.

Менің білуімше, ол жылына шамамен 6 миллион доллар табады, қазір әлемдік рейтингте сегізінші орында тұрған команданы жаттықтырып отыр. Сондықтан оған әлемдік рейтингтің алғашқы жүздігіне де кірмейтін командаға, әлдеқайда аз жалақыға келу неге қызық болуы мүмкін екенін түсіндіріп бере алатын кез келген адаммен сөйлесуге дайынмын. Реалист болу керек", - деді ол.

Сонымен қатар Манн "Ливерпульдің" бұрынғы бапкері Арне Слотты да тілге тиек етті.

"Өткен аптада араларыңыздан біреу "Ордабасыны" тізгіндеуі керек бапкер туралы жазып, Арне Слотты атап өтіпті. Мен Арнені танимын - ол керемет бапкер, әлемдегі үздіктердің бірі. Бірақ мен сіздерге уәде бере аламын: Арне Слот "Ордабасыны" жаттықтыруға келмейді. БАҚ мәліметінше, ол "Ливерпульде" жылына 15 миллион долларға жуық жалақы алған. Егер клуб оның келуі үшін барлық қаржысын беріп, оны көндіруге дайын болмаса, бұл мүмкін емес нәрсе", - деді Манн.

Сондай-ақ Манн ұлттық құрама тізгінінде қазақстандық маманды көргісі келетінін айтты.

"Мен командамен бірге көп саяхаттаймын, бірақ екі күн бұрын біз бір жарым-екі сағаттай ортақ әңгіме өткіздік. Меніңше, футболшылар ұлттық құрама кейінгі 13 жылда қандай қиындықтарды өткергені туралы көп нәрсе айтып бере алды. Олар ашық әрі шынайы пікір білдірді. Енді бізге дәл қандай бапкер керек екенін жақсы түсінемін. Төрт ай бұрын мұндай түсінік болған жоқ. Менің шетелдік немесе жергілікті маман болсын деген ешқандай алдын ала көзқарасым жоқ. Бірақ өз ұстанымыма келсек, егер лайықты қазақстандық маман болса, мен әрдайым бірінші кезекте соны шақырғым келеді", - деді ол.

Фото: TengriNews.kz/ Әлімжан Аманжол

Маннның айтуынша, бапкердің жасы да маңызды болмақ.

"Бізге қолжетімді бапкерлер арасындағы үздігі ғана керек емес. Бізге ұлттық құрама үшін жауапкершілікті өз мойнына алуға дайын, лайықты жастағы маман қажет", - деп атап өтті ол.

ҚФФ бас хатшысы ұлттық құраманы жас бапкер басқарса, бұл оған үлкен сынақ болатынын айтты.

"Біз футболда көптен бері жұмыс істеп келе жатқан тәжірибелі маман Байсуфиновтың өзіне қаншалықты үлкен қысым жасалғанын көрдік. Сондықтан, егер біз жас бапкерді алып, оны құрама басына қойып, сіздердің, журналистердің күнделікті сынына қарамастан табысқа жетеміз деп ойласақ, мұны жақсылап ойлануымыз керек. Бірақ мен нақты айтқым келеді: егер осы лауазымға лайықты қазақстандық маман табылса, ол мен үшін бірінші кезектегі үміткер болады", - деп түйіндеді функционер.

Қазақстан құрамасы бапкерсіз және жеңіссіз қалды

Еске сала кетейік, Қазақстан құрамасының алдыңғы бапкері командамен жарты жыл да жұмыс істеген жоқ. Ұлттар лигасының Джон ван ’т Схип бастаған алты матчінде Қазақстан құрамасы бірде-бір жеңіске жете алмады - команда үш рет тең түсіп (екі рет Фарер аралдарымен және бір рет Словакиямен), үш рет жеңілді. Оның ішінде екі рет әлемдік рейтингте бізден төмен тұрған Молдовадан ұтылды.

Соңғы матчте Қазақстан құрамасы Словакия командасына қарсы 1:0 және 2:1 есебімен алда тұрғанымен, басымдықты сақтап қала алмай, 95-минутта гол өткізіп алды.

Алдыңғы циклде – 2026 жылғы Әлем чемпионатының іріктеу кезеңінде команданы Әли Әлиев, кейін Талғат Байсуфинов басқарды. Соңғысының тұсында Лихтенштейн құрамасы жеңіліп (4:0), Бельгия және Солтүстік Македониямен (1:1) тең ойын тіркелді.

Біздің команда келесі ресми матчтерін наурызда өткізеді – 2028 жылғы Еуропа чемпионатының іріктеуі басталады. Бұл кезеңнің жеребесі 6 желтоқсанда өтеді.

Фото: TengriNews.kz/ Әлімжан Аманжол

Қазақстан құрамасы Ұлттар лигасындағы сәтсіздіктен кейін бас бапкерсіз қалды

ФИФА УЕФА-ға қарсы: Қазақстан дауыс беруде қай жақты қолдайтынын әлі шешпеді