УЕФА мәліметінше, УЕФА атқарушы комитеті мен ФИФА кеңесіндегі ұлттық қауымдастықтар Франция футбол федерациясының (ФФФ) президенті Филипп Диаллоға 2027 жылғы наурызда өтетін ФИФА президенті сайлауына өз кандидатурасын жолдауды ұсынған.
Диалло бұл ұсыныстан бас тартпаған, бүгіннен бастап ФИФА президенті лауазымына ресми үміткер болады.
Осылайша, УЕФА-ның қолдауына ие болған Диалло ФИФА-ның қазіргі президенті Джанни Инфантиноның сайлаудағы басты бәсекелесіне айналмақ.
ҚФФ жаңа үміткер туралы не ойлайды?
Еске салайық, Қазақстан футбол федерациясы бұған дейін де УЕФА мен ФИФА арасындағы текетіресте белгілі бір тарапты қолдаған болатын. Жазда Қазақстан футбол федерациясы (ҚФФ) Еуропада Халықаралық футбол федерациясына (ФИФА) қарсы басталған әлем чемпионатына бойкот жариялау бастамасын қолдауы мүмкін екенін мәлімдеген еді.
"Бұл - бүкіл футбол қауымдастығы үшін маңызды мәселе. Әлем чемпионаты бірнеше буын ойыншылардың, ұлттық құрамалар мен жанкүйерлердің еңбегі нәтижесінде қалыптасты. Сондықтан оны инвестициялық өнім ретінде қарастыруға болмайды", – деп жауап берген болатын сол кезде ҚФФ біздің сауалымызға.
Соған қарамастан, ҚФФ-да әзірге бұл мәселеге қатысты нақты шешім жоқ. Ал федерацияның бас хатшысы Скотт Манн УЕФА ұсынған кандидатпен жеке таныс екенін айтты.
- Кеше УЕФА ФИФА президенті лауазымына ұсынылған үміткерді қолдайтынын мәлімдеді. Бұған дейін Қазақстан ФИФА-мен арадағы осы текетіресте УЕФА-ны қолдаған еді. Бұл жолы бірнәрсе өзгере ме? Қазақстан футбол федерациясы УЕФА-ны тағы да қолдай ма?
– Бірнеше деректі айта кетейін. Кеше түнде ҚФФ басшысымен сөйлестім. Бұған дейін ол УЕФА өкілдерімен телефон арқылы сөйлесіп, ұйымның ұстанымымен танысқан. Өзім үміткерді жеке танимын. Ол Франция футбол федерациясында қызмет атқарған кезде кездескенбіз.
Бүгін федерация төрағасымен әлі сөйлескен жоқпын. Себебі кейінгі екі сағат бойы осында (баспасөз мәслихатында - еск.) отырмын. Дегенмен ол барлық қолда бар ақпарат пен деректі ескеріп, Қазақстан футбол федерациясының мүддесіне сай шешім қабылдайтынына сенімдімін, – деді Манн Tengri Sport тілшісіне берген жауабында.
Сурет: Tengrinews.kz/ Әлімжан Аманжол
УЕФА ФИФА-ға қарсы: Еуропаның Халықаралық футбол басшылығына көңілі толмайды
Еске салайық, 2026 жылы жазда ФИФА басшылығының әлем чемпионатын қайта ұйымдастыру жоспарына байланысты дау шықты. БАҚ мәліметінше, ФИФА әлем чемпионаты мен клубтар арасындағы әлем чемпионатын басқаруға тиіс FIFA Forward Enterprise атты еншілес компания құруды көздеген.
Бұл келісім ұйымға 4 миллиард доллардан аса табыс әкелуі мүмкін еді. Ал ФИФА президенті Джанни Инфантино жеке сыйақы алуы ықтимал болған. Оның үстіне, президенттік мерзімі аяқталған соң Инфантино жаңа компанияны өзі басқаруы мүмкін деген болжам айтылды.
УЕФА мен басқа құрлық футбол ұйымдары ФИФА осылайша футболды коммерцияландырып жатыр деп есептеп, бірлескен мәлімдеме жасады. Олар ФИФА бұл жоспарын жүзеге асырса, әлем чемпионатына бойкот жариялауға дайын екенін жеткізді.
Көп ұзамай ФИФА бұл жоспардан бас тартты, ал ұйым президенті Джанни Инфантино футбол қауымдастығынан кешірім сұрады.
Соған қарамастан, Инфантино әлемдік футболды басқару ниетінен бас тартқан жоқ. Ол президенттікке тағы бір мерзімге өз кандидатурасын ұсынбақ.
Филипп Диалло деген кім?
Франция футбол федерациясының президенті Инфантиноға қарсылас ретінде сайлауға қатысады. Ол қазіргі ФИФА президентінен жеті жасқа үлкен.
Диалло кәсіби футболшы болмаған. Алайда 1992 жылдан бастап Франциядағы кәсіби футбол клубтарының мүддесін қорғайтын ұйымды басқарған.
Кейін ол ұзақ уақыт Францияның Кәсіби футбол лигасы директорлар кеңесінің мүшесі болды. Ал 2021 жылы футбол федерациясының вице-президенті қызметіне тағайындалды. Диалло 2023 жылы федерацияны басқарды.
1 an après le cyclone Garance, la @FFF tient son engagement à La Réunion et contribue à la réhabilitation des infrastructures endommagéee. Avec la @FIFA, les FIFA Arenas de Saint-Paul et Saint-Benoît voient le jour pour redonner des terrains, du jeu et du lien. Merci à tous ⚽🇫🇷 https://t.co/2q8uNTP9QI
— Philippe Diallo (@PhilippeDiallo) 24 сәуір, 2026 жыл
Бұған дейін ҚФФ бас хатшысы Скотт Манн федерация ұлттық құраманың бас баспкері Джон ван ’т Схиппен келісімшартты ұзартпайтынын мәлімдеген болатын.