Футбол федерациясы Қазақстан құрамасының бас бапкеріне қатысты жағдайды түсіндірді

Қазақстан футбол федерациясы (ҚФФ) БАҚ-тағы ұлттық құраманың бас бапкері Талғат Байсуфиновтың ықтимал отставкасы туралы хабарламаларға қатысты пікір білдірді, деп хабарлайды Tengri Sport.

Қазақстандық БАҚ-та ұлттық құраманың алдағы матчтардағы нәтижесіне қарамастан, ҚФФ маманды қызметінен босату туралы шешім қабылдайды деген ақпарат тарады.

Тәжірибелі қазақстандық маманның орнына грекиялық Анге Постекоглу шақырылуы мүмкін екені айтылып жатыр.

"Қазақстан футбол федерациясы бірқатар бұқаралық ақпарат құралында тараған мәліметтерге жауап ретінде Қазақстан ұлттық құрамасының бас жаттықтырушысы Талғат Байсуфиновтың ықтимал отставкасы туралы ақпараттың шындыққа жанаспайтынын мәлімдейді.

ҚФФ Талғат Маруанұлы Байсуфиновты толық қолдайды, маманның кәсіби қызметін, ұлттық құраманың дамуына қосқан үлесін, сондай-ақ команданы алдағы матчтар мен турнирлерге дайындау жұмысын жоғары бағалайды.

Біз БАҚ өкілдерін, блогерлер мен әлеуметтік желі пайдаланушыларын тек ресми дереккөздерге сүйенуге және жұртшылықты адастыруы мүмкін расталмаған ақпаратты таратпауға шақырамыз", - делінген мәлімдемеде.

Еске сала кетейік, Талғат Байсуфинов Қазақстан құрамасын 2025 жылдың қазан айында басқарды. Оның жетекшілігімен ұлттық құрама ӘЧ-2026 іріктеу кезеңінде үш матч өткізіп, бірде-бір рет жеңілген жоқ.

Қазақстандықтар Лихтенштейнді 4:0 есебімен ойсырата жеңіп, Солтүстік Македониямен (1:1) және Бельгиямен (1:1) тең түсті. Байсуфиновтың жетекшілігімен өткен соңғы матчта құрама тағы да тең ойнады - бұл жолы Армения командасымен (1:1).

Байсуфинов үшін құрамадағы бұл үшінші жұмыс кезеңі.

Ертең, 9 маусымда Қазақстан құрамасы Венгрия командасына қарсы ойын өткізеді.

Бұған дейін футболдан 19 жасқа дейінгі Қазақстан құрамасы жеңіске жетіп, Еуропа чемпионатының іріктеу кезеңіндегі матчта сербиялық құрдастарынан басым түсті және топта бірінші орынға шықты.