Футболдан Қазақстан құрамасының жаңа бапкеріне қойылатын талаптар жарияланды

Фото © Tengrinews.kz / Әлімжан Аманжол

Қазақстан футбол федерациясының баспасөз қызметі 9лттық құраманың бас бапкері лауазымына үміткерлерге қойылатын талаптарды жариялады, деп хабарлайды Tengri Sport.

Тиісті құжатты Қазақстан футбол федерациясының техникалық комитеті әзірлеген және ол жаңа тәлімгерді таңдауға көмектесуі тиіс.

Үміткерге қойылатын негізгі талаптар:

Қысым жағдайында жұмыс істеу тәжірибесі: қысқа мерзімді жаттығулар, жауапкершілік және маңызды ресми матчтер кезінде тиімді жұмыс істеу қабілеті.

Тактикалық икемділік: қарсыласқа, ойын стратегиясына, құрамдағы өзгерістер мен ойын барысына қарай ойын жоспарын тез бейімдей білу.

Көшбасшылық және коммуникация: талапшыл, бірақ құрметке негізделген басқару стилі, қиын жағдайларда сабыр сақтай білу және медиа кеңістігінде команда мүддесін тиімді қорғай алу қабілеті.

Көпфункциялы коучингтік персонал: сарапшыларды, физикалық дайындық жөніндегі жаттықтырушыларды және қақпашылар жаттықтырушысын қамтитын мамандар командасын құру қабілеті.

Еске сала кетейік, 22 маусымда футболдан Қазақстан құрамасының бұрынғы бас бапкері Талғат Байсуфинов қызметінен кету туралы шешім қабылдады.

Instagram-дағы бұл жарияланымды көру

Kazakhstan Football Federation (@kff_resmi) жарияланымы

Кейінірек Қазақстан футбол федерациясының (ҚФФ) президенті Марат Омаров Қазақстан құрамасына жаңа бас бапкер іздеу туралы айтып, жаңа тәлімгерді іздестіру жұмыстары шетелдік және жергілікті мамандар арасында жүргізіліп жатқанын мәлімдеді.

Айта кетейік, ұлттық құрама келесі матчтарын 2026 жылдың қыркүйек айының соңында Ұлттар лигасы аясында өткізуі тиіс.