Хоккейден Қазақстан құрамасы ӘЧ иелерінен жеңісті жұлып алды: элитаға шығу үшін не қажет?

Хоккейден Қазақстан құрамасы әлем чемпионатындағы тартысты матчте Польша командасын қапы қалдырып, жеңісті жұлып алды. Енді хоккейшілерімізге турнирде топ жару үшін бір ғана жеңіс қажет, деп хабарлайды Tengri Sport.

Хоккейден бірінші дивизиондағы әлем чемпионатының үшінші матчінде Қазақстан құрамасы айдын иелерінен 0:1 есебімен ұтылып жатып, ойын тағдырын өз пайдасына шешті және жеңісті сериясын жалғастырды. Енді Жайлауов шәкірттерінің қоржынында 9 ұпай бар және турнир аяқталуына екі тур қалғанда олар көш басында нық тұр.

Хоккейден 2026 жылғы ӘЧ турнирлік кестесі

Украина құрамасы Францияны күтпеген жерден жеңген соң, элиталық дивизион жолдамасы үшін талас айтарлықтай шиеленісе түсті.

Бұл ретте Қазақстан шешуші турларда негізгі қарсыластарымен кездесу өткізуі тиіс.

1. Қазақстан - 9 ұпай;
2. Украина - 6 ұпай;
3. Франция - 5 ұпай;
4. Польша - 4 ұпай;
5. Жапония - 2 ұпай;
6. Литва - 1 ұпай.

Қазақстанға әлемдік хоккей элитасына қайта оралу үшін не қажет?

Еске сала кетейік, әлем чемпионатының бірінші дивизионына қатысу - келесі маусымда элиталық дивизионға жолдама беретін іріктеу кезеңі іспетті.

Турнирге қатысатын алты команданың ішінен бірінші немесе екінші орын алғандар элитаға жолдама алады.

Қазіргі уақытта Талғат Жайлауовтың командасы элитаға шығуды әлі толық қамтамасыз еткен жоқ, бірақ Украинаға қарсы келесі ойында бұл мәселені шешуі мүмкін.

Ал Украинаны негізгі уақытта жеңген жағдайда Қазақстан құрамасы Франциямен болатын ойын нәтижесіне қарамастан, турнирде бірінші орынды иеленуге кепілдік алады.

Ал Украинаны буллит сериясында жеңген жағдайда Қазақстан құрамасы элиталық дивизионға жолдаманы қамтамасыз етеді. Ал бірінші орын тағдыры, сірә, француздармен болатын ойында шешіледі.

Егер қазақстандықтар Украинадан буллит бойынша ұтылса, бірінші сатыда қалады, бірақ француздардан негізгі уақытта жеңілуге құқығы болмайды.

Егер украиндар Қазақстанды негізгі уақытта жеңе алса, кестеде көш бастайды. Себебі ұпайлар тең болған жағдайда үздік команда өзара кездесулер нәтижесі бойынша анықталады. Бұл ретте Қазақстан Францияны міндетті түрде жеңуі керек, әйтпесе команда үздік екіліктен (топ-2) шығып қалу қаупі бар.

Қазақстан құрамасы көшбасшыларынсыз ойнап жатыр

Еске сала кетейік, бірінші дивизиондағы әлем чемпионатына Қазақстан құрамасы негізгі шабуылшысы мен қорғаушысы - Никита Михайлис пен Валерий Ореховсыз келді. Турнир басталған сәтте екеуі де Магнитогорскінің "Металлургымен" бірге Гагарин Кубогі жолындағы күресті жалғастырып жатқан еді.

Қазіргі уақытта олардың командасы жарыстан шығып қалғанымен, Михайлис пен Орехов Қазақстан құрамасына қосылмайды. Ұлттық құрама жаттықтырушысының айтуынша, оларға виза рәсімдеп үлгермеген, ал құраманың турнирге қатысатын тізімі толық жасақталып қойған.

Соған қарамастан, Қазақстан құрамасы турнирдегі алғашқы екі матчта сенімді жеңіске жетті (Литваны 4:1 және Жапонияны 6:0 есебімен), сондай-ақ Польшаға қарсы ойында есепті өзгертіп, 3:2 есебімен басым түсті.

Сарапшы әрі комментатор Александр Олейник турнир басталар алдында Tengri Sport тілшісіне берген сұхбатында Михайлис пен Орехов болмаса да, команда турнирде жеңіске жетіп, әлемдік хоккей элитасына қайта оралуы тиіс екенін мәлімдеген болатын.

Команда турнирдегі шешуші матчтарын 7 және 8 мамыр күндері өткізеді.