“Жалаңаш дене емес, тәртіп“ - қазақстандық спортшылар Сидни Суинидің даулы видеосы туралы

Коллаж: Tengri Sport

Әлеуметтік желілерде "Қызметші әйел" (The Maid) фильмі мен "Эйфория" сериалының жұлдызы Сидни Суини түскен жарнамаға қатысты дау өршіп тұр. Ол қатысқан роликке қатысты қазақстандық чемпиондардың пікірі екіге жарылды, деп хабарлайды Tengri Sport.

Өткен аптада әлеуметтік желілерде Голливуд жұлдызы Сидни Суинидің жалаңаш тәнін тек спорттық құралдармен бүркеп түскен ролигі шықты. "Тек спорт" деп аталатын видео букмекерлік кеңселердің бірін жарнамалайды.

Әлеуметтік желілерде ролик бірмағыналы қабылданбады - көпшілік, соның ішінде атақты шетелдік спортшы қыздар, актрисаның бұл әрекетін әйелдер спортын сексуалдандыруды қолдау деп есептеді.

Tengri Sport тілшісі атышулы видео туралы пікірін білу үшін бірнеше қазақстандық спортшы қыздарға сауалнама жүргізді.

"Басқаша үндеу көргім келер еді"

Сауалнамаға қатысқан спортшылардың кейбірі бұл даудан хабарсыз болған, бірақ роликті көргеннен кейін өз ойларын білдірді.

"Шыны керек, бұл роликке дейін ол актрисаны танымайтынмын, сондықтан оған деген жеке көзқарасым жоқ. Бірақ спортшы ретінде маған мұндай жарнама жат. Меніңше, спорт жалаңаш тән арқылы емес, қайрат, мінез, еңбек, қозғалыс әдемілігі және адамның жетістігі арқылы насихатталуы тиіс.

Мен үшін әйел тәні - жарнамаға назар аударту үшін көпшілікке паш ететін дүние емес. Әйел затында жасырын әрі қастерлі бір дүние болуы керек және оны жарнама құралына айналдырудың қажеті жоқ деп есептеймін", - деді Tengri Sport-қа берген сұхбатында үш қарғып секіруден Азия чемпионы Мария Ефремова.

Спортшының айтуынша, ол мұндай жарнамадан басқаша мағына көргісі келеді.

"Мен актрисаның өзін айыптамаймын, әр адам қалай көрінуді және қандай жобаларға қатысуды өзі шешеді. Бірақ дәл спорт туралы айтатын болсақ, мен басқаша үндеу көргім келер еді: назарды жалаңаш тән мен сексуалдылыққа емес, күш-жігерге, еңбекке, тәртіпке және нақты спорттық жетістіктерге аударса деймін. Меніңше, спорттың өзі сондай сұлу әрі қуатты, оған көз тарту үшін мұндай әдістерді қолданудың мүлдем қажеті жоқ", - деп атап өтті ол.

Instagram-дағы бұл жарияланымды көру

Qazaq Athletics 🇰🇿 (@qazathletics) жарияланымы

Осыған ұқсас ұстанымды бокстан әлем чемпионы Ангелина Лукас та қолдайды.

"Мен де қарсымын. Оған әйел ретінде немесе сырт келбетіне қарсы емеспін. Мен сол сөздерге және спортшылар өз тәнімен өтейтін құндылықтардың осыншалықты оңай құнсыздануына қарсымын", - деп жазды ол Instagram парақшасында және жекпе-жектен кейінгі суреттерін жариялады.

Қазақстандық спортшы спорттың тек сұлулық емес, сонымен бірге жарақат пен ауырсыну екенін еске салды.

"Бұл - қан, көгерген жерлер мен ауырсыну. Бұл - тек жата қалып, көзіңді жұмғың келетін ауыр жекпе-жектен кейінгі допинг-сынама. Бұл - жаттығу залына қайта оралу үшін қайта-қайта емдеуге тура келетін тексерістер, ем-шаралар, оңалту және тізе. Сидни боксшының рөлін сомдады. Бірақ боксшыны ойнау - боксшы болу дегенді білдірмейді.

Камера өшеді, түсірілім күні аяқталады, грим жуылады. Ал нағыз спортшы өз жарақаттарымен, ауырсынуымен және оның салдарымен жылдар бойы қалады. Біз бір соққы бәрін өзгертетінін түсіне отырып, айқасқа шығудың не екенін білеміз. Тәнің "болды, жетер" деп тұрса да, қайта тұрудың не екенін білеміз", - деді ол.

Instagram-дағы бұл жарияланымды көру

Angelina Lukas (@angelina_lukas1997) жарияланымы

"Әркім өз жұмысымен айналысады": қазақстандықтар Сидни Суиниді қолдады

Сауалнамаға қатысқандар арасында америкалық актрисаға бағытталған хейтті түсінбейтіндер де табылды.

"Шыны керек, хейттің не үшін екенін түсінбеймін. Әркім өз жұмысымен, өз ісімен айналысады. Жарнамалары осыншалықты шу тудырғанына қарағанда, олар өз жұмысын жақсы атқарған сияқты", - деді тілшімізбен әңгімелескен волейболдан Қазақстан құрамасының капитаны Кристина Белова.

Instagram-дағы бұл жарияланымды көру

Kris (@_kristinabelova) жарияланымы

Жеңіл атлетикадан Азияның бес дүркін чемпионы Аделина Земс те бұл роликте өзіне деген балағат немесе қорлық жоқ деп есептейді.

"Мен бұл роликте өзіме қатысты қорлайтын ештеңе көрген жоқпын. Ол спортшы емес, актриса, сондықтан әйелдер спортының не екенін жақыннан білуі мүмкін емес. Ал спорт - жалаңаш тән емес, жылдар бойғы жаттығу, қан мен тер, қуаныш пен өкініш. Егер ол басқаша ойласа, өз пікіріне құқылы", - деп атап өтті ол Tengri Sport-қа берген сұхбатында.

Instagram-дағы бұл жарияланымды көру

Жарияланым: Adelina Zems 🏃🏻‍♀️‍➡️ (@adelinazems)

Айта кетейік, сынға қарамастан, видео әлеуметтік желілерде зор танымалдылыққа ие болуда. Жарияланғаннан кейін бірнеше күн ішінде Сидни Суини түскен ролик 48 миллионнан аса қаралым жинаған.