“Жауынгерлік рух“: жаңа бапкер Қазақстан құрамасының ерекшелігі туралы айтты

Фото © Tengrinews.kz / Роман Павлов

Нидерландық маман Джон ван ’т Шкип футболдан Қазақстан ұлттық құрамасының бас бапкері қызметіне тағайындалғаннан кейін алғашқы мәлімдемесін жасады, деп хабарлайды Tengri Sport.

Нидерланды құрамасының сапында Еуропа чемпионы атанған маман бүгін қазақстандық ұжымның жаңа тәлімгері ретінде ресми түрде таныстырылды.

"Маған осындай мүмкіндік бергені үшін Қазақстан футбол федерациясына алғыс айтамын. Мен бұл шақыртуды үлкен қызығушылықпен қабылдадым. Бұл мен үшін зор мәртебе. Алда ауқымды жұмыс күтіп тұр. Қазақстандықтар – рухы мықты күрескер халық, біз бірлесе отырып, осы қасиетті алаңда көрсете білетін құрама жасақтаймыз.

Қазақстан футболы кейінгі жылдары айтарлықтай жетістіктерге жеткенін білемін. Мен тәжірибелі ойыншыларға да, болашақта командаға жаңа сапа әкелетін жастарға да назар аударамын. Жұмысқа кірісуге асықпын", - деді бапкер баспасөз мәслихатында.

Шабуылдаушы стильге басымдық берілетін Нидерландыда жұмыс істеу тәжірибесі болса да, бапкер тек туған елінде үйренген тактиканы ғана қолданбайтынын қадап айтты.

"Футболда тек шабуыл немесе тек қорғаныс болмайды. Бүкіл команда мен бүкіл құрамаға талдау жасау маңызды. Әрине, менің өз стилім бар – Нидерландыда үйренген мектебім. Бірақ өзге де тәжірибелерім бар. Түрлі стильдерді ұштастырғым келеді. Ұлттық құрамада өз талаптарыңды толықтай іске асыру қиын екенін білемін, бірақ соған тырысамын", - деп атап өтті маман.

Сондай-ақ маманнан қазақстандық менталитеттің ерекшеліктерін қалай пайдалануды жоспарлап отырғаны туралы сұралды.

"Мен үшін бұл бірегей дүние, мұны мәселе деп санамаймын. Спортқа келер болсақ, қазақстандық мәдениет өзінің мықты тұстарын көрсетіп үлгерді деп ойлаймын. Бапкерлер штабынан қазақстандықтардың жауынгерлік рухы жоғары екенін естідім. Олар күресуге дайын. Команданы дайындау үшін менің тиісті тәжірибем бар. Ойыншылар өз әлеуетін толық ашуы үшін тиісті атмосфера қалыптастырып, тәртіпті сақтау керек деп есептеймін", - деді маман.

Фото: TengriNews.kz/Роман Павлов

Жаңа бапкерге міндет жүктелді

ҚФФ бас хатшысы Скотт Манн Джон ван ’т Шкиптің жаңа командада бірден нәтиже көрсетуі тиіс екенін мәлімдеді.

"Біз мақсаттарымызды нақты білеміз. Басты мақсат – Ұлттар лигасында топта жеңіске жетіп, B лигасына оралу", - деді ол баспасөз мәслихатында.

Сонымен қатар ол маманның келісімшарты туралы да пікір білдірді.

"Келісімшарттың барлық талабы құпия, бірақ ең маңыздысы – біз алдымен танысу жұмыстарын жүргіземіз, содан кейін барып ұзақ мерзімді келісімге қол қою үшін келіссөздер үстеліне отырамыз", - деп түсіндірді Манн.

Айта кетейік, Қазақстан құрамасы жаңа бапкердің бастауымен алғашқы матчін 26 қыркүйекте сырт алаңда Фарер аралдарына қарсы өткізеді. Осы кездесумен команда Ұлттар лигасының жаңа маусымындағы жолын бастайды.

Фото: TengriNews.kz/Роман Павлов