“Жеңіл-желпі жарақат“: Еркебұлан Тоқтар жол апатына түсті

Еркебұлан Тоқтар жол апатына түсті. Спортшының айтуынша, ол бұл жағдайды сақ болу керек екені туралы белгі ретінде қабылдаған, - деп хабарлайды Tengri Sport спортшының әлеуметтік желідегі парақшасына сілтеме жасап.

30 жастағы файтер Instagram-да жол апатның салдары түсірілген видео жариялады. Видеодан ол мотоциклімен автокөлікке соғылып, оған зақым келтіргені байқалады.

Тоқтардың өзі мен көлік құралы айтарлықтай зардап шекпеген.

"Дөңгелекпен тидім-ау деймін... Маған ештеңе болмапты, жеңіл-желпі жарақат! Аға, кешірші, шынымен, әдейі істеген жоқпын", - дейді ол көлік жүргізушісімен сөйлескен сәтінде.

Кейінірек Тоқтар жол апаттан кейінгі ойын бөліскен видео жариялады.

"Бүгін Құдай сақтады. Бүгінгі болған жағдайды мен былай түсіндім: "Азартына кірме Еркебұлан", деді ғой Аллаһ Тағала. Жай көрсетті маған, міне мынадай болады... авария қалай болғанын түсінбей қаласың деп... Мотоциклмен арасында, көлік аз кезде бір айналып келгенге болады. Азартына кіріп бара жатқан едім негізі. Күнде мініп жүргенмін, көлікке мүлде отырмай қойдым. Байыппен, ақырын жүру керек екен", - деді спортшы.

Айта кетейік, оқиға орнына полиция қызметкерлері шақырылды ма және екінші жүргізушімен мәселе қалай шешілгені белгісіз.

Еркебұлан Тоқтар деген кім?

Еске сала кетейік, Еркебұлан Тоқтар - ұзақ уақыт бойы поп-MMA-да өнер көрсетіп, кейін кәсіпқой жекпе-жекке ауысқан актер. Оның қазіргі рекорды - 11-3.

Арменияда өткен соңғы жекпе-жегінде Тоқтар төрешілердің шешімімен Қырғызстан өкілі Марсель Нұрланбек ұлынан жеңіліп қалды.

Қазіргі уақытта Тоқтар Қазақстандағы поп-MMA-ның ең танымал өкілі - оның парақшасына 2,3 миллион адам жазылған.