Жеңілмеген қазақстандықтың жекпе-жегі күтпеген нокаутпен аяқталды

Орта салмақтағы қазақстандық боксшы Виктор Теміров тәжірибелі венесуэлалық Джонни Санчесті мерзімінен бұрын жеңіп, өзінің жеңісті сериясын жалғастырды. 2026 жылғы 3 қазанда Гамбургте (Германия) өткен жекпе жек алты раундқа жоспарланған болатын.

Бірінші раундтың аяғында Теміров 39 жастағы қарсыласын шаршы алаңда сұлатып салды. Санчес орнынан тұрып, жекпе-жекті жалғастырғанымен, екінші раундта қазақстандық оны тағы екі рет нокдаунға жіберді.

Үшінші рет құлағаннан кейін төреші кездесуді тоқтатты – техникалық нокаутпен жеңіс тіркелді.

Виктор Теміров деген кім?

Виктор Теміров – қазақстандық кәсіпқой боксшылар жаңа буынының жарқын өкілдерінің бірі. Ол 1999 жылыАлматы облысының Базаркелді ауылында дүниеге келген.

Боксқа біршама кеш – 16 жасында келді. Әуесқойлық мансабы да ұзаққа созылмады. Теміров бастапқыдан кәсіпқой боксты көздеп, әуесқойлық атақтарға немесе Олимпиадаға ұмтылмаған.

Кәсіпқой рингтегі дебюті 2021 жылдың шілдесінде Мюнхенде (Германия) өтті. Теміров жекпе-жектерінің барлығын дерлік Германияда өткізеді – бұл елде кезінде Геннадий Головкин де кәсіпқой жолын бастаған болатын.

2026 жылдың ақпанында Бад-Херсфельдте Теміров жеңілмеген неміс боксшысы Доменик Арнольдты бесінші раундта техникалық нокаутпен тоқтатып, орта салмақта WBF нұсқасы бойынша әлем чемпионы атағын жеңіп алды.

Теміров – жаңа Головкин бе?

Германия жұртшылығы мен жергілікті мамандар Виктор Теміровті жас Геннадий Головкинмен жиі салыстыра бастады.

2000-жылдардың басындағы GGG сияқты, Теміров те мансабын Германияда құрып жатыр. Мұнда қазақстандық боксшыларды қатал әрі тартысты жекпе-жек шеберлері ретінде танып қалған.

Сондай-ақ жас қазақстандықтың рингтегі агрессиясы, қысым көрсетуі, ашық айқасқа дайындығы және жеңістерінің көбін мерзімінен бұрын аяқтауы оны Головкинге ұқсата түседі.

“Тартысты жекпе-жектер керек“ - қазақстандық файтер титулдық кездесудегі нокаут туралы

18 секундтағы нокаут қырғызстандыққа UFC келісімшартын сыйлады