Венгрлермен текетірестің тағдырын сырт алаңдағы 1:3 есебімен тіркелген жеңіс шешті. 4 қарашада Алматыда өткен қарымта кездесуде "Қайрат" ойын барысында алда тұрғанымен, жеңісті уысынан шығарып алды (2:2).
Осылайша, "Қайраттың" жасөспірімдері өз жас ерекшеліктері бойынша Еуропадағы басты клубтық турнирдің плей-офф кезеңіне шығуға бір қадам жақындады. Қазақстан футболы тарихында болмаған бұл жетістікке жету, атап айтқанда, ересектер арасындағы Чемпиондар лигасы қатысушыларының академияларымен бәсекелесетін 1/16 финалға жолдама алу үшін алматылықтарға чехиялық "Градец-Кралове" клубын жеңу қажет.
УЕФА Жасөспірімдер лигасының форматы
Турнир регламентіне сәйкес, оған өз елдерінің жасөспірімдер лигасының чемпиондары, сондай-ақ Чемпиондар лигасының ортақ кезеңіне жолдама алған клубтардың жастар командалары қатысады. Олар тек плей-офф кезеңінде ғана өзара кездесе алады: 1/16 финалға чемпиондар жолының 10 қатысушысы мен ортақ кезеңнің 22 үздік командасы шығады.
"Қайрат" чемпиондар жолының алғашқы раундында Черногорияның "Младость Донья Горица" командасын жеңген болатын, енді міне венгриялық мықты қарсыласын да жарыс жолынан шығарды.
Айта кетейік, әзірге қазақстандық командалардың ешқайсысы УЕФА Жасөспірімдер лигасының плей-офф кезеңіне дейін жете алмаған.
Турнирдің үшінші раундындағы матчтер 25 қараша мен 9 желтоқсанға жоспарланған.
Еске сала кетейік, "Қайраттың" негізгі құрамы биылғы маусымда Чемпиондар лигасының ортақ кезеңіне өте алмай, Конференция лигасында өнер көрсетіп жатыр. Алматылықтар келесі ойынын Италияда "Аталантаға" қарсы өткізеді.