“Қайраттың“ 26/27 Чемпиондар лигасындағы алғашқы матчі: қайда және қашан көруге болады?

Фото © Tengrinews.kz / Маржан Қуандықова

Бүгін, 8 шілдеде алматылық "Қайрат" қатарынан екінші жыл Чемпиондар лигасының негізгі кезеңіне жорығын іріктеудің бірінші кезеңінен бастайды. Алдыңғы маусымда алматылықтар іріктеуден өтіп, еуропалық футбол алпауыттарымен ойнаған болатын, деп хабарлайды Tengri Sport.

Қазақстандық клуб іріктеуді Черногорияның "Сутьеска" командасына қарсы өз алаңындағы матчпен бастайды.

"Қайраттың" Чемпиондар лигасындағы қарсыласы туралы не белгілі?

"Сутьеска" – Черногорияның алты дүркін және қазіргі чемпионы. Команда бұған дейін ешқашан еурокубоктардың негізгі кезеңіне шығып көрген емес.

2018 жылы "Сутьеска" Қазақстанға Еуропаның басты турнирінің іріктеу кезеңі аясында келген болатын. Ол кезде черногориялықтар "Астана" қақпасына бірде-бір гол соға алмай, 0:3 есебімен жеңіліп қалды.

"Қайрат" матчтің фавориті, бірақ команда Сәтбаевсыз қалай ойнамақ?

Transfermarkt порталының бағалауы бойынша, команда көшбасшысы Дастан Сәтбаевтың кеткеніне қарамастан, алматылықтар құрамы сапа тұрғысынан айтарлықтай басым.

"Сутьеска" құрамы 5 миллион еуроға бағаланса, олардың ең қымбат ойыншысы, жартылай қорғаушы Марко Шимун 700 мың еуро тұрады. "Қайраттың" құны одан екі есе жоғары (шамамен 10 миллион еуро), ал португалиялық Жоржиньоның бағасы бір миллион еуроға жетті.

Сондай-ақ "Қайраттың" басымдығы ретінде ойын тонусын айтуға болады – Қазақстанда чемпионат қызып тұрса, черногориялықтар өз маусымын әлі бастаған жоқ, кейінгі ресми матчін мамырда өткізген.

Алматылықтар үшін кейбір қауіп кейінгі маусымдағы команданың үздік сұрмергені Дастан Сәтбаевтың Лондонға кетуімен байланысты болуы мүмкін. Алайда ҚПЛ аясында алматылықтар оның жоқтығын білдіртпей, барлық үш кездесуде 12:3 жалпы есебімен жеңіске жетті.

Instagram-дағы бұл жарияланымды көру

«Қайрат» ФК | FC Kairat Almaty (@f.c.kairat) жарияланымы

"Қайраттың" былтырғы Чемпиондар лигасындағы жолы

Еске салсақ, алдыңғы маусымда "Қайрат" Еуропадағы жолын іріктеудің бірінші кезеңінен бастаған еді. Чемпиондар лигасына барар жолда Словенияның "Олимпиясын" (3:1), Финляндияның "КуПС" клубын (3:2), Словакияның "Слованын" (пенальти бойынша 4:3) және Шотландияның "Селтигін" (пенальти бойынша 3:2) жеңген болатын.

Былтырғы қарсыластардың барлығы бүгінгі қарсыласқа қарағанда әлдеқайда мықты.

"Қайрат" - "Сутьеска": тікелей трансляция

Қазақстандық команданың Черногория клубына қарсы матчі бүгін сағат 20:00-де басталады.

Ойынды Qazsport арнасы тікелей эфирде көрсетеді, сонымен қатар транслиция арна сайтында қолжетімді болады.

Айта кетейік, "Сутьеска" - "Қайрат" арасындағы қарымта матчті Qazaqstan арнасы осындай режимде көрсетеді. Бұл ойын шілденің 16-сына қараған түні футболдан Әлем чемпионатының жартылай финалымен қатар өтеді.

Әлем чемпионатының 1/4 финалына шыққан барлық жұп анықталды