Қазақстан құрамасы ең қымбат футболшысынан айырылды: себебі белгілі

ҚФФ баспасөз қызметінің мәліметінше, ұлттық құрама көшбасшыларының бірі жарақатына байланысты кем дегенде екі матчті өткізіп алады.

"Футболдан Қазақстан құрамасының ойыншысы Максим Самородов жарақатына байланысты УЕФА Ұлттар лигасының сырт алаңда Фарер аралдары мен Словакияға қарсы өтетін матчтеріне қатыспайды. Ұлттық құраманың өз алаңында Молдова мен Фарер аралдарына қарсы ойындарына қатысу-қатыспауы әзірге белгісіз. Ол құраманың медициналық штабының бақылауында болады", - деп атап өтті ҚФФ.

Осылайша, Максим бұған дейін осындай себеппен құрамнан шығып қалған Ислам Чесноков, Әлібек Қасым және Дастан Сәтпаевтың қатарына қосылды.

Еске сала кетейік, Қазақстан құрамасы 26 қыркүйекте Ұлттар лигасының жаңа маусымындағы алғашқы ойынын өткізу үшін Фарер аралдарына жетіп алды.

29 қыркүйекте команда сырт алаңда Словакиямен ойнайды, содан кейін Молдова және Фарер аралдарымен өтетін ойындарға Астанаға оралады.

Самородов - Қазақстан құрамасының ең қымбат ойыншысы

Бірнеше күн бұрын беделді Transfermarkt порталы Максим Самородовтың жаңа құнын жариялады. Сайттың бағалауы бойынша, ол Дастан Сәтпаев, Ислам Чесноков, Бахтиер Зайнутдинов және команданың басқа да көшбасшыларын басып озып, Қазақстан құрамасының ең қымбат ойыншысы атанды.

Вингердің құны 4 миллион еуроға бағаланып отыр.

Қазақстанның ең қымбат футболшысы анықталды: оның құны 500 миллион теңгеге өскен

Еске сала кетейік, бүгін Қазақстан U21 құрамасы футболдан Еуропа чемпионатының іріктеу кезеңінде Англия командасына қарсы матч өткізеді.