Қазақстанның ең қымбат футболшысы анықталды: оның құны 500 миллион теңгеге өскен

Фото © Tengrinews.kz / Маржан Қуандықова / Әлімжан Аманжол

Transfermarkt порталы Ресей премьер-лигасы ойыншыларының жаңа құнын анықтады. Жаңартылған мәліметтер бойынша, "Ахмат" вингері Максим Самородов Қазақстан құрамасының ең қымбат ойыншысы атанды, деп хабарлайды Tengri Sport.

24 жастағы қазақстандық жартылай қорғаушының бағасы бір миллион еуроға (507 миллион теңгеге жуық) қымбаттап, қазір 4 миллион еуроға (2 миллиард теңгеден аса) бағаланып отыр. Бұған дейін Қазақстан құрамасының ең қымбат ойыншысы Дастан Сәтпаев болған - 3,5 миллион еуро.

Қазақстандықтар арасында құны жағынан келесі орында құрама капитаны әрі Санкт-Петербургтің "Зенит" клубының қорғаушысы Нұралы Әліп тұр - 2 миллион еуро.

Қазақстанның ең қымбат 10 футболшысы

Максим Самородов ("Ахмат") - 4 миллион еуро;
Дастан Сәтпаев ("Бернли") - 3,5 миллион еуро;
Нұралы Әліп ("Зенит") - 2 миллион еуро;
Бахтиёр Зайнутдинов ("Динамо") - 2 миллион еуро;
Ислам Чесноков ("Крылья Советов") - 1,2 миллион еуро;
Әлібек Қасым ("Астана") - 850 мың еуро;
Темірлан Анарбеков ("Қайрат") - 800 мың еуро;
Стас Покатилов ("Сабах") - 600 мың еуро;
Рамазан Оразов ("Елімай") - 600 мың еуро;
Ян Вороговский ("Астана") - 600 мың еуро.

Айта кетейік, алғашқы ондықтағы ойыншылардың жартысынан астамы Қазақстан чемпионатынан тыс жерде өнер көрсетеді.

Максим Самородов туралы не белгілі?

24 жастағы Максим Самородов 2024 жылдың тамызында "Ахматқа" (Грозный, Ресей) ауысты. Осы уақыт ішінде Ақтөбе футболының түлегі 14 гол соғып, 16 нәтижелі пас берді және негізгі құрам ойыншыларының біріне айналды.

Биылғы маусымда ол "Ахмат" сапында барлық турнирде 10 матч өткізіп, бір гол соқты және екі нәтижелі пас берді. Максимнің еншісінде ұлттық құрамада өткізілген 33 матчте 5 гол бар.