Қазақстан құрамасы Олимпиада чемпиондарын жеңіп, Азия чемпионатын ұтты

Семсерлесуден Қазақстан құрамасы шпагамен семсерлесуден Азия чемпионатында жеңіске жетті. Нью-Делиде (Үндістан) өткен турнир финалында қазақстандықтар Жапониядан қазіргі Олимпиада чемпиондарын тізе бүктірді, деп хабарлайды Tengri Sport.

Финалдық жекпе-жектерде Қазақстан шпагашылары Жапония командасын 45:40 есебімен жеңіп, кейінгі жылдардағы ірі турнирлердегі жеңілістер сериясы үшін реванш алды.

Азия чемпионатындағы жеңіс жолында Ерлік Сертай, Никита Жулинский, Вадим Шарлаимов және Кирилл Проходовтан құралған Қазақстан құрамасы Иран, Өзбекстан және Оңтүстік Корея спортшыларынан басым түсті.

Жапония құрамасы сапында финалдық бәсекеге екі дүркін Олимпиада чемпионы Коки Кано да шықты. Шешуші айқаста ол қазақстандық жас спортшы Кирилл Проходовтан 9:5 есебімен жеңіліп қалды.

"Бұл менің жаныма батады": Қазақстан құрамасының көшбасшысы жапондар туралы

Еске сала кетейік, Жапония құрамасы өткен Азия чемпионаты мен Азия ойындары финалында Қазақстаннан басым түскен болатын.

Сонымен қатар Коки Кано қазақстандық Руслан Құрбановты Олимпиада медалінен айырса, кейін біздің құрама Грузияда өткен Әлем чемпионатының жартылай финалында жапондарға жол беріп, нәтижесінде тарихи қола жүлдені иеленген еді.

"Шынымды айтсам, бұл менің жаныма батады. Оған Олимпиада ойындарында, Әлем кубогінде, Азияда да есе жібердім. Бұл жігіт шығып, бір кездесудің тағдырын шешті. Біз жапондармен жақсы өнер көрсеттік, барлық жерде артықшылық болып, жеңіске жетіп жаттық, бірақ бір жігіт бәрін өзгертіп жіберді", - деді Құрбанов Tengri Sport-қа берген сұхбатында.

Былтыр қазаннан бастап Жапония құрамасының көпжылдық жаттықтырушысы Александр Горбачук Қазақстан құрамасымен жұмыс істей бастады, енді бұл өз жемісін беріп жатыр.