Қазақстан құрамасы Ұлттар лигасындағы сәтсіздіктен кейін бас бапкерсіз қалды

Сурет © Tengrinews.kz / Роман Павлов

Қазақстан футбол федерациясының (ҚФФ) бас хатшысы Скотт Манн ұлттық құраманың бас бапкері Джон ван ’т Схиппен ынтымақтастық тоқтағанын жариялады, деп хабарлайды Tengri Sport.

17 қарашада Скотт Манн Ұлттар лигасының қорытындысы бойынша баспасөз мәслихатын өткізді.

"Келісімшарт осы аптаның соңында аяқталады. Біз де, ол да келісімді ұзартуға ниетті емеспіз. Біз құраманы Еуропа чемпионатына шығара алатын, ұзақ мерзімді кезеңге арналған жаңа менеджерді іздеуді бастаймыз", - деді Скотт Манн.

Сонымен қатар, бас хатшы маманның жалақысы құраманың бұрынғы бапкері Талғат Байсуфиновтің жалақысымен бірдей болғанын айтты.

"Джон осында келіп, Талғатпен бірдей жалақы алуға келісті", - деді ол.

Сурет: Tengrinews.kz/ Әлімжан Аманжол

Бұған дейін Словакия құрамасына қарсы өткен соңғы матчтен кейінгі баспасөз мәслихатында бапкер құрамадағы жұмысын аяқтау жоспарында бар-жоғы туралы сұраққа жауап берген болатын.

"Қазақстанда тамыздан бері жүрмін. Менің міндетім Ұлттар лигасын өткізу болды, сондықтан қазір дәл осы кезеңдеміз", - деді бапкер Словакияға қарсы ойыннан кейін.

Джон ван ’т Схип Қазақстан құрамасымен бірге бірде-бір жеңіске жеткен жоқ

Еске салайық, Нидерландыдан келген маман Қазақстан құрамасын 2026 жылғы 7 тамыздан бері басқарған болатын. Осы уақыт ішінде оның жетекшілігімен команда Ұлттар лигасында алты кездесу өткізіп, бірде-бір жеңіске жете алмады: Молдовадан екі рет жеңілді, Фарер аралдарымен екі рет тең ойнады, сондай-ақ, сырт алаңда словактардан ұтылып, өз алаңындағы ойынды тең аяқтады.

Сонымен қатар, турнир барысында бапкер топта бірінші орын алу міндетін қойған болатын.

Голландиялық маман келгенге дейін де құрама қатарынан бес ресми матчте жеңіске жете алмаған еді. Команда соңғы рет 2025 жылы 10 қазанда ӘЧ-2026 іріктеуі аясында өз алаңында Лихтенштейн құрамасын 4:0 есебімен жеңген болатын.

Бұдан бөлек, 2026 жылы наурызда FIFA Series жолдастық турнирі өтіп, Қазақстан құрамасы Комор аралдары мен Намибия командаларын ұтқан еді. Ол кезде команданы Талғат Байсуфинов жаттықтырды. Тәжірибелі қазақстандық маман 2026 жылы 22 маусымда командадан кету туралы шешім қабылдады.

Талғат Байсуфинов футболдан Қазақстан құрамасының бас бапкері қызметінен кетті

Пікірлер