Қазақстан құрамасының көшбасшылары жанжалдан кейін бас бапкерсіз қалды

"Металлург" бапкердің шеттетілгенін мәлімдеп, қалыптасқан жағдайға қатысты түсініктеме берді. Директор Алексей Жлобаның айтуынша, клуб бапкермен жанжалдасқан хоккейшілерді сатуға тырысқан, бірақ одан нәтиже шықпағаннан кейін басқа жолды таңдаған.

"Команда ішіндегі жағдай шынымен де талқыланып жатыр және біз оны жасыруға ниетті емеспіз. Бас бапкер мен ойыншылар арасында ойын мәселесіне де, өзара қарым-қатынас сипатына да қатысты келіспеушіліктер туындады. Бұл кәсіби спорттағы қалыпты жағдай: бапкер ойыншыларға талап қоюға, ал ойыншылар өз ұстанымын білдіруге құқылы.

Бұл келіспеушіліктер команда ішінде шешілмей, жұмыс ахуалына әсер ете бастағанда мәселе туындады. Клуб мұны ескеріп, жағдайға араласты", - деді Жлоба.

Қақтығысты шешу үшін қандай шешім қабылдау жоспарланған?

"Біз бірнеше кезеңнен өттік. Алдымен клуб ойыншыларды трансферге шығару нұсқасын қарастырды - бұл тараптар ортақ тіл табыса алмаған жағдайдағы қалыпты нарықтық процедура. Алайда, қазіргі уақытта лайықты ұсыныстар түскен жоқ. Сонымен қатар жағдайды жұмыс барысында реттеу үшін бапкерлер мен ойыншылар арасында келіссөздер бастадық. Өкінішке қарай, ортақ мәмілеге келу мүмкін болмады, бұл ымыраға келуге орын қалдырмады.

Клуб президенті бастаған басшылық бас бапкерді команданы басқарудан уақытша шеттету туралы шешім қабылдады. Бұл түпкілікті үкім емес, жағдайдың ушығуын тоқтатуға және сыртқы қысымсыз бағалауға мүмкіндік беретін басқарушылық шешім", - деп атап өтті басшы.

"Оның көңіліне қарап, бәйек болуым керек пе?": Разиннің хоккейшімен жанжалы көпшілікке жария болды

Құрлықтық хоккей лигасының (ҚХЛ) ең беделді мамандарының бірі жиі шулы баспасөз мәслихаттарын өткізіп, кейін сол үшін айыппұл арқалап жатады. Осы маусымда ол БАҚ арқылы команданың жетекші ойыншыларының бірі Владимир Ткачевпен ашық кикілжің бастады.

Баспасөз мәслихаттарының бірінде Разин ашуға мініп, журналистерге былай деп шүйлікті:

- Сен Ткачев, Ткачев деп отырсың! Қайдағы Ткачев? Оның бүгін не істегенін көрдің бе? Оның бүгін қалай ойнағанын көрдің бе?

- Жалпы оның өз бабында емес екені көрініп тұр.

- Қайдағы бап? Ойнауы үшін оған бәрін дайын қылып, алдына жайып салып, көңіліне қарап бәйек болуым керек пе? Жауап бер маған! Мен оған не істеуім керек?

Ол - хоккейші. Бапкер не айтса, соны орындауы тиіс. "Қаласам ойнаймын, қаламасам ойнамаймын" деген болмайды. Осындай адамдар ісіне жауапкершілікпен қарауы үшін бапкердің беделі болуы керек, олар кіммен ойнайтынын ойлап отырмауы тиіс, - деді тәлімгер.

Айта кетейік, қазақстандық сарапшы әрі комментатор Александр Олейниктің пікірінше, "Барыс" бапкері Михаил Кравец баспасөз мәслихатында мұндай әрекетке ешқашан бармайды.

- Михаил Григорьевич баспасөз мәслихатында мұндай сөз айта ма?

- Жоқ деп ойлаймын. Біріншіден, ол Санкт-Петербургтің, Ленинградтың тумасы, мәдениеттің ошағында өскен жан емес пе? Сондықтан бұл екіталай. Бұл сөздің синонимі бар ма? Меніңше, Разин де жақын арада басқа синонимдер іздей бастайды, - деді сарапшы біздің тілшімізбен әңгімелесу барысында.

Ал Разинге келетін болсақ, бапкер өткен маусымдарда да команда көшбасшылары - капитан Егор Яковлев, шабуылшы Евгений Кузнецов және басқа да хоккейшілермен кикілжіңге келген болатын.

"Металлург" қазақстандық ойыншының дебюттік матчінде "Адмиралдан" жеңілді

Бапкердің қызметінен шеттетілуі оның командасы Шығыс конференциясының аутсайдерлерінің бірі - Владивостоктың "Адмиралынан" жеңілгеннен кейін болғаны назар аудартарлық. Матч 2:5 есебімен аяқталды, ал Разин ойыншыларды жұмысқа деген құлықсыздығы үшін айыптады.

"Біз бүгін жұмыс істегіміз келмеді. Өкінішке қарай, бапкерлік жұмыс хоккейшілерді жұмыс істеуге мәжбүрлеуді де қамтиды. Бүгін мен мұны істей алмадым", - деді ол.

"Адмирал" сапында қазір Қазақстан құрамасының бірден үш ойыншысы өнер көрсетеді: Максим Мусоров, Никита Бояркин және жас қақпашы Жәлел-әд-Дин Әмірбеков. Соңғысы өткен маусымды толығымен "Металлурргтің" фарм-клубында өткізіп, ҚХЛ-да дебют жасауға мүмкіндік ала алмаған еді.

Қызығы сол, Қазақстан құрамасының көшбасшылары - Михайлис пен Ореховқа қарсы матчте Әмірбеков өз мүмкіндігін алып, оны тамаша пайдаланды: 24 жастағы қақпашы 36 соққыға тойтарыс беріп, командаластарынан көптеген мақтау алды.

Айта кетейік, жеңіліске қарамастан, "Металлург" 19 ұпаймен Шығыс конференциясында көш бастап тұр және биылғы маусымдағы чемпиондыққа басты үміткерлердің бірі болып саналады. Маусымның алғашқы ойындарынан кейін Александр Олейник Магнитогорск командасын Гагарин кубогының болашақ финалистерінің бірі деп атаған болатын.

“ҰХЛ-ға алады“: Қазақстан құрамасының қақпашысы жанкүйерлерді таңғалдырды