“ҰХЛ-ға алады“: Қазақстан құрамасының қақпашысы жанкүйерлерді таңғалдырды

Фото © Tengrinews.kz / Маржан Қуандықова

Хоккейден Қазақстан құрамасының қақпашысы Андрей Шутов "Спартакқа" қарсы матчтің буллит сериясында бірде-бір шайба өткізбей, кездесудің үздік ойыншысы атанды. Tengri Sport "Барыс" жұлдызының ҚХЛ-дағы жаңа маусымы туралы негізгі деректерді жинақтады.

"Барыстың" 28 жастағы қақпашысы биылғы маусымда Шепардпен негізгі құрамдағы орын үшін сәтті бәсекелесіп жүр. Ол бір матчті "құрғақ" есеппен өткізіп үлгерсе, "Спартакқа" қарсы ойын барысында 41 соққыға тосқауыл қойып, жеңісті буллит сериясында тағы бірнеше әсерлі сейв жасады.

Нәтижесінде команда оны кезекті рет матчтің үздік ойыншысы деп таныды, ал әлеуметтік желідегі жанкүйерлер қазақстандыққа таңданыстарын жасырмай жатыр.

"Нағыз аңыз, не деуге болады";
"Шутовты ҰХЛ-ға алып кетеді";
"Жарайсың, Шутов";
"Сөз жоқ, жарайсың", - деп жазды олар.

Instagram-дағы бұл жарияланымды көру

"Барыс" хоккей клубының жарияланымы (@barys_official)

"Ол рахаттанып ойнап жүр" – сарапшы Шутовтың маусымы туралы

Тілшімізбен болған сұхбатта сарапшы әрі комментатор Александр Олейник Андрей Шутовтың биылғы маусымда неге мұндай сәтті өнер көрсетіп жатқаны туралы пікір білдірді.

"Андрей Шутов қазір тек бабында ғана емес, ол ойыннан рахат алып жүр. Неге екенін түсіндірейін. Біріншіден, ол екінші қақпашының жағдайын көріп отыр. Былайша айтқанда, Шепард сәл дайын емес сияқты. Оның бойында сенімсіздік бар, оған қоса тұрақтылық жетіспейді. Оның орындауындағы керемет сейвтерді жиі көре бермейміз. Шайба өткізіп алды ма? Иә, көп өткізді.

Шепард әзірге бірінші нөмірлі қақпашы ретінде толық сенім ұялата алмай тұр. Меніңше, Андрей Шутов мұны көріп, мүмкіндікті 100-200 пайызға пайдаланып жатыр. Ол мұзайдынға шығып, ойыннан ләззат алады. Оның стилінде ештеңе өзгерген жоқ. Андрейдің қақпадан айтарлықтай алға шығып ойнайтынын көріп жүрміз, бұл оның өзіндік мәнері. Ол осылайша өзінің кейбір кемшін тұстарын жабады. Бәрі сәтті шығып жатыр, бәріміз оны жақсы көреміз", - деп атап өтті сарапшы тілшімізбен әңгімесінде.

Сонымен қатар, сарапшының пікірінше, егер "Барыс" құраманың тағы бір қақпашысы Никита Бояркинді сақтап қалғанда, Шутов өзін мұншалықты сенімді сезінбеуі де мүмкін еді.

"Андрей қазіргі ойынымен қақпашы жасауы тиіс нәрсенің бәрін өте жоғары деңгейде орындап жүр. Бірақ қазір Бояркин болса, Шутов осылай ойнар ма еді – бұл үлкен сұрақ. Бояркиннің қазір "Адмиралда" жүргеніне қуаныштымын. Бұдан бүкіл қазақстандық хоккей ұтып отыр деп ойлаймын. Үйде – Шутов, Владивостокта – Бояркин.

Қақпашылар шебіне келсек: Шепард әзірге екіұдай пікір қалдырып отыр, өйткені құтқару керек жерде құтқаратындай көрінгенімен, команданы сүйреу керек сәтте әрдайым көмектесе бермейді. Ал Андрей Шутовта қазір екеуі де сәтті шығып тұр. Маңызды әрі қажетті сәттердегі сейвтері де бар, жалпы оның қазір рахаттанып ойнап жүргені көрініп тұр", - деп түйіндеді сарапшы.

Еске сала кетейік, осы маусымның басында "Барыс" қақпашы Никита Бояркинмен қоштасу туралы шешім қабылдаған болатын. Биыл ол Владивостоктың "Адмирал" сапында өнер көрсетіп, жаңа командасы үшін 7 кездесу өткізіп үлгерді.

Андрей Шутов туралы не белгілі?

Еске салсақ, Андрей Шутов – Өскемен хоккей мектебінің түлегі. Ол "Барыс" сапында 2021/2022 маусымында дебют жасап, содан бері команда үшін 102 матч өткізді.

Биылғы маусымда ол қайтарылған соққылар пайызы бойынша ҚХЛ-дағы үздік 5 қақпашының қатарына кіреді – көрсеткіші 94 пайыз.

Қазақстан құрамасы сапында элиталық дивизиондағы төрт әлем чемпионатына қатысты, сондай-ақ А дивизионындағы әлем чемпионатын және қысқы Азия ойындарын жеңіп алды.

Өткен жылы SauBall YouTube-арнасында Шутовпен көлемді сұхбат шыққан болатын, онда ол өзінің өмірі, Еуропаға қысқа мерзімге кетуі және Қазақстан құрамасы үшін ойыны туралы егжей-тегжейлі айтып берген еді.

"Барыс" камбэк жасап, буллит сериясында "Спартакты" жеңді