Қазақстан құрамасының танымал ойыншысы мансабын аяқтайтынын жариялады

40 жастағы хоккейші ойыншы ретіндегі кезеңі аяқталғанымен, хоккей оның өмірінің бір бөлігі болып қала беретінін айтты.

"Бүгін мен үшін ерекше күн. Кәсіби ойыншы мансабымды аяқтайтынымды ресми түрде хабарлайтын уақыт келді. Бұл маған көптеген жағымды эмоция сыйлаған керемет кезең болды. Бірінші кезекте ата-анама және отбасыма алғыс айтқым келеді.

Сіздер уақыттарыңызды қиып, жеңілістерімде бірге мұңайып, жеңістеріме бірге қуандыңыздар. Сіздердің қолдауларыңызсыз бұл жолдан өту мүмкін болмас еді. Сондай-ақ бірге айдынға шыққан барлық ойыншыға, бірге жұмыс істеген бапкерлерге, клубтардың басшылығы мен қызметкерлеріне үлкен алғыс айтамын. Ешқандай жеңіс жеке келмейді, әр табыстың артында қаншама адамның еңбегі тұр.

Жанкүйерлерге ерекше алғыс айтамын. Сіздер ең жарқын сәттерде де, ең қиын шақтарда да қасымнан табылдыңыздар. Сіздер үшін ойнау мен үшін үлкен мәртебе болды. Сіздер мәңгі менің жүрегімдесіздер! Хоккей менің бір бөлшегім болып қала береді, алда жаңа кезең, жаңа мақсаттар мен жаңа белестер күтіп тұрғанына сенімдімін!" – деді Старченко.

Роман Старченко – қазақстандық хоккейдің аңызы

Старченко "Барыста" 17 маусым өткізіп, бір команда сапында ойнаған матчтер саны бойынша ҚХЛ рекордшысы атанды (819). Лигада ол барлығы 871 матч өткізіп (мансабының бір бөлігінде Мәскеудің "Спартагында" ойнады), 215 шайба салды, сондай-ақ 209 нәтижелі пас берді.

Бұдан бөлек Старченко Қазақстан құрамасы сапында 18 Әлем чемпионатына (оның 10-ы – элиталық дивизионда) қатысты. Екі рет Азия ойындарының алтынын жеңіп алып, Азия чемпионы атанды.

Старченконы Овечкинмен салыстыратын, бірақ ҰХЛ рекордшысы жаңа келісімшартқа қол қойды

Маусым соңында хоккей сарапшысы әрі комментатор Александр Олейник Роман Старченко "50 жасқа дейін ойнай алар еді" деген еді. Бұл ретте соңғы маусымда Роман "Барыс" үшін емес, Қазақстан чемпионатында "Номад" сапында өнер көрсетті.

"Онымен Овечкин сияқты істеуге болар еді. Мүмкін ойын уақыты көп болмас, бірақ сан басымдығын пайдалану кезінде оған бір-бір жарым минуттық карт-бланш беруге болатын. Дегенмен, Романның өзі де егер ойыны жүрмей жатса, 30-40 секунд ойнап, ауысуға кетер еді деп ойлаймын. Біз мұны Вашингтондағы Овечкиннен көріп жүрміз.

Мәселен, "Вашингтонның" бір ойынында бес рет басымдықты пайдалану мүмкіндігі болып, бірде-бір гол соғылмады. Бірақ алтыншы мүмкіндікте бәрі тамаша үйлесіп, Овечкин "офистен" гол салды! Мұнда да солай істеуге болар еді. Үш мүмкіндік жүзеге аспаса да, Старченко өзінің соққысымен гол соға алар еді немесе шиеленісті пас шығарып берер еді", - деді комментатор.

– Старченкоға не болды өзі? Оны "Барыстан" "Номадқа" қалай ауыстырып жіберді?

"Менің білуімше, бұл Романның өз бастамасы болды. Ол құрамда өзіне орын мен ойын уақыты табылмасын түсінген сияқты. Михаил Кравецтің барлық ойыншыға қояр талабын ескерсек, ол басшылыққа немесе бапкерге барып, сөйлескен болуы керек. Басында "иә" деп, кейін "жоқ" деп, соңында "иә" деп шешілген көрінеді.

Жалпы, Старченко туралы көбісі қоштасу матчі деп айтып жүрді... Бірақ Романның Pro Hokei Ligasy-ндағы ойынына қарап, оның тоқтағысы келмейтінін, ойнағысы келетінін байқауға болады. Меніңше, біздің чемпионаттың деңгейімен ол Ягр сияқты 50 жасқа дейін еркін ойнай алады", - деді Олейник Tengri Sport тілшісіне берген сұхбатында.

Айта кетейік, Александр Овечкин де қазақстандық хоккей аңызы сияқты 40 жаста. Оның 2026/2027 жылғы маусымды тағы "Вашингтонда" өткізіп, Уэйн Гретцкидің тағы бір рекордын жаңартуға тырысатыны белгілі болды.