“Қазақстан маған көп нәрсе берді“ - Рыбакина жеңіс жолындағы қолдау туралы

27 жастағы теннисші мансабында алғаш рет US Open турнирінде жеңіске жетіп, жарыс қорытындысы бойынша әлемдік рейтингтің көшбасшысы атанды. Оның айтуынша, егер Қазақстанда оған сенім артпағанда, мұндай жетістікке жетпес еді.

"Қазақстан маған көп нәрсе берді. Кәсіби турда бағымды сынап көру мүмкіндігі мен және отбасым үшін өте маңызды шешім болды. Мен мектепті жаңа ғана бітіріп жатқан кезім еді, сондықтан АҚШ университеттеріне түсуге көптеген ұсыныс түсті. Қалай болғанда да, Қазақстан теннис федерациясы мені жақсы нәтиже көрсеткен турнирлердің бірінде байқап қалды.

Олар маған сенді, Қазақстандағы басқа да көптеген адам маған сеніп, жолымда қолдау көрсетті. Мен өте ризамын. Бұл бүкіл ел үшін маңызды оқиға, мен ол жаққа барып, мені қолдайтын, жақсы көретін, ең бастысы - басынан бастап маған сенген жандармен бірге осы жеңісті тойлауды асыға күтемін", - деді Рыбакина WTA баспасөз қызметіне берген сұхбатында.

Айта кетейік, Рыбакина АҚШ-тағы жеңісінен кейін Қазақстанға алғаш рет алғыс айтып отырған жоқ. US Open турнирінің қорытынды баспасөз мәслихатында ол елге келетінін хабарлаған болатын.

Сонымен қатар Елена CBS арнасындағы танымал таңғы шоуда қазақстандықтардың қолдауы туралы пікір білдірді.

Елена Рыбакина - дәл қазір әлемдегі үздік теннисші

Еске сала кетейік, Елена Рыбакина кәсіби теннистегі жолын 2016 жылы бастап, 10 жыл ішінде WTA-ның 14 титулын жеңіп алды. Олардың ішіндегі ең бастылары - 2022 жылғы Уимблдон, 2025 жылғы Қорытынды турнир, сондай-ақ 2026 жылғы Australian Open және 2026 жылғы US Open жеңістері.

Қазіргі уақытта Рыбакинаның әлемдік рейтингтегі екінші ракетка Арина Соболенкодан басымдығы 2026 ұпайды құрайды. Жыл соңына дейін бірінші сатыда қалу үшін қазақстандық спортшыға Азиядағы турнирлер сериясында және әсіресе WTA Қорытынды турнирінде сәтті өнер көрсету қажет.

Рыбакина маусым аяқталғанға дейін бірнеше ай бұрын Қорытынды турнирге қатысуға жолдама алған алғашқы теннисші атанды.

Бұған дейін Елена Рыбакина осы маусымдағы ең көп табыс тапқан теннисшілер рейтингінде көш бастады.

Ал әлемнің бұрынғы бірінші ракеткасы Арина Соболенкоға US Open-2026 финалында Рыбакинадан жеңілгеннен кейін қомақты ақшалай айыппұл салынуы мүмкін.