Қазақстан поп-ММА файтеріне іздеу жариялады: ол қайда және кіммен жұдырықтасқан?

Бейнеден алынған кадрлар

26 жастағы блогер әрі поп-MMA файтері Махмуд Хикматовқа заңсыз интернет-казиноларды жарнамалады деген күдікпен халықаралық іздеу жарияланды. Tengri Sport блогердің жекпе-жек өнеріндегі мансабына қатысты негізгі деректерді жинақтады.

Хикматов 2021 жылы бүкіл Қазақстанға кеңінен танылды. Ол кезде Ақтау қаласының тұрғыны өз денесін жарнама үшін сататынын мәлімдеген болатын - ол кез келген брендке 30 миллион теңге үшін өз денесіне татуировка жасатуды ұсынды.

Бұл айла-тәсіл іске асып, Хикматовтың танымалдылығы арта бастады. Блогер өзін танытудың бір жолы ретінде поп-MMA додаларына қатысуды таңдады.

Поп-MMA-дағы жекпе-жектер: Хикматовты кімдер жеңді

2023 жылдан бастап блогер Қазақстанда үш рет рингке шықты. Алғашқы жекпе-жекте оның қарсыласы Нұрдәулет "Мапоох" Жұмаев болды.

Файтерлер рингтегі көрініс барынша "қызу" болуы үшін әлеуметтік желілерде жанжал шығарып, бір-біріне тіл тигізді. Тәжірибесі мол Жұмаев екінші раундта Хикматовтың басынан бірнеше соққы бағыттап, оны сұлатып түсірді.

Жарты жылдан кейін "Маха" рингке қайта оралып, Рамис Құлахметовпен кездесті. Комедия актері қарсыласын одан да тез жеңді - бір минуттан сәл астам уақыт ішінде Хикматов бұрышта отырып қалды.

Мұндай жеңілістерден кейін жекпе-жек мансабын аяқтауға болар еді, бірақ Махмуд Хикматов тағы бір талпыныс жасады. Бұл жолы оның қарсыласы поп-MMA-ның ең танымал файтерлерінің бірі - "Дикий" немесе "Дарабоз" лақап атымен танымал Данияр Мырзаханов болды.

Бұл жекпе-жек те бір минуттан сәл ғана асты - Хикматов бірден басынан соққылар алып, канвасқа құлады.

Енді Хикматовқа іздеу жарияланды: себебі неде?

Махмуд Хикматовқа халықаралық іздеу жарияланған туралы ақпарат Құқықтық статистика және арнайы есепке алу органдарының порталында пайда болды.

Қаржылық мониторинг агенттігі блогерді SultanGames, PINCO, Nomadcasino, Pin-Up, Vavada және басқа да заңсыз интернет-казиноларды насихаттады деп күдікке ілінгенін хабарлады.

ҚМА мәліметінше, Қазақстан Республикасының аумағында интернет-казиноның заңсыз интерфейсін ұсыну, қаражатты қабылдау және төлеу (эквайринг, мобильді коммерция, криптовалюта), сондай-ақ ел азаматтары арасынан көбірек ойыншыларды тарту мақсатында жарнама жасаудың тұрақты схемасы жұмыс істеген.

Ұйымдастырушылар жарнамалау мақсатында басқа да инфлюенсерлерді қызықтыру үшін блогерді тартқан. Хикматов блогерлерден олардың әлеуметтік желілеріндегі статистикалық мәліметтерді, соның ішінде жазылушылардың демографиясы мен географиясын, сондай-ақ аудиторияны қамту көрсеткіштерін сұратып отырған, соның негізінде жарнамалық қызметтердің құны белгіленген.

Қазақстан блогер Махмуд Хикматовқа халықаралық іздеу жариялады