Қазақша
Русский
Бүгін Қазақстанға ауыр атлетикадан жасөспірімдер арасындағы Әлем чемпионатының жеңімпаздары оралды, деп хабарлайды Tengri Sport.
Колумбияда өткен додада отандастарымыз сәтті өнер көрсетіп, ел қоржынына екі алтын, екі күміс және бір қола медаль салды. Әсіресе 88 келіге дейінгі салмақ дәрежесінде бақ сынаған Нұржан Жұмабай ерекше көзге түсті. Ол екі алтын медальды иеленіп, әлем чемпионы атанды, сондай-ақ "серпе көтеру" жаттығуында 193 келіні бағындырып, әлемдік рекорд орнатты. Қараой ауылынан шыққан 15 жастағы Нұржан өзге елдерден келген қарсыластарына еш мүмкіндік қалдырмай, әлемдік ауыр атлетикадағы көшбасшылығын дәлелдеді.
Сондай-ақ Ернұр Мырзахмет жоғары деңгейде өнер көрсетті. Бапкерлер штабы мәліметінше, Ернұр жақында жарақат алып, Әлем чемпионаты қарсаңында ғана қалпына келе бастаған. Қайсарлық танытқан ол әлемдік біріншілік үздік үштігіне еніп, "жұлқа көтеру" жаттығуында күміс, ал қос сайыс қорытындысы бойынша қола медаль иеленді.
Астана әуежайында чемпиондарды салтанатты түрде қарсы алды.
Олардың қазіргі жас кезінде-ақ көрсетіп жүрген нәтижелерін ескерсек, елдің жастар құрамасының ауыр атлеттері үшін бұл сәт алдағы уақытта талай мәрте келетін танымалдылық пен атақ-даңқтың бастамасы ғана.
- Спортшыларымыздың бұл жеңісін қаншалықты күткен едіңіздер, әлемдік рекордты болжадыңыздар ма және турнир қорытындысына қандай баға бересіз?
- Әрине, балалар дайындалды, ойланды, жоспарлады. Ұзақ ұшудан кейін, уақыт белдеуі мен климаттың ауысуына қарамастан өнер көрсетуге тура келді. Бұл - спорт, спортшы ағзасының мұндай өзгерістерге қалай әсер беретінін ешкім алдын ала біле алмайды. Жақсылықтан үміттендік. Дарынды әрі мықты шәкірттеріміз бұл жолы да өздерін дәлелдей білді, - дейді жасөспірімдер құрамасының бапкері Альберт Хакимулин.
- Демек, қорытынды күткендегіден де жоғары болды ғой?
- Атлеттеріміздің физикалық дайындығынан жоғары болды деп айта алмаймын. Бәрі жоспарланғандай өтті. Біз тыңғылықты дайындалдық, оқу-жаттығу жиындарын өткіздік. Барлық жағдай жасалды, сол үшін спортқа үлкен қолдау көрсетіп отырған еліміздің Үкіметіне алғыс айтамыз. Мінекей, нәтиже де көп күттірген жоқ.
Айта кетейік, Әлем чемпионатына Қазақстаннан барған үш қатысушының екеуі жүлдемен оралды. Жасөспірімдердің келесі турнирі - Азия чемпионатында құрам бұдан да көп болады.
- Неге мұндай шағын құраммен қатысуды ұйғардыңыздар?
- Біріншіден, Колумбия өте алыс жерде орналасқан. Ұзақ ұшу мен климаттың түбегейлі өзгеруі спортшыларға бәрібір әсер етеді, мұндай додалардан кейін қалпына келу үшін ұзақ уақыт қажет. Үш аптадан соң Өзбекстанда жастар арасындағы Азия чемпионаты өтетінін ескере отырып, біздің алдымызда командалар үшін басымдыққа ие чемпионатты анықтау және құрамды дұрыс жасақтау бойынша стратегиялық міндет тұрды. Федерациямен бірлесе отырып, ел қоржынына алтын салу үшін Әлем чемпионатына құрама көшбасшысын және осындай деңгейдегі жарыстарда тәжірибесі бар екі жас спортшыны апаруды ұйғардық. Таңдауымыз қате болған жоқ - жігіттер жүлде алып, медальдардың толық жиынтығын жинады. Қазір еліміздің ересектер ұлттық құрамасына үміткер ретінде қарастырылып жатқан Нұрсила Берікбол әлемнің ең мықты бес спортшысының қатарына енді, бұл оның жасы үшін өте жақсы көрсеткіш.
Қалған 36 спортшы Азия чемпионатына үздіксіз дайындалып жатыр, онда біз толық құраммен өнер көрсетіп, жалпыкомандалық есепте жүлделі орындарға таласуды жоспарлап отырмыз.
Ауылдан шыққан әлем чемпионы - алғашқы жеңіс
Калидегі турнирдің басты кейіпкері 15 жастағы Нұржан Жұмабай болды. Ол алтын иеленіп қана қоймай, өз жас санатында жаңа әлемдік рекорд орнатты.
- Осындай маңызды медальды иеленгеннен кейінгі сезіміңді бөліссең. Бұл сенің алғашқы Әлем чемпионатың, әрі бірден мұндай жетістік.
- Сезімімді сөзбен айтып жеткізу мүмкін емес. Финалдық сайыстан кейін үлкен жеңілдік пен қуанышты сезіндім. Бұл мен үшін жаңа деңгей. Турнирде әлсіз қарсылас болған жоқ, бәрі өте мықты, сондықтан бұл медальдың орны бөлек.
- Мұндай жетістіктен кейін қандай да бір арман-тілектерің пайда болған шығар. Егер қазір саған жүлде ақшасы берілсе, оны неге жұмсар едің?
- Шынымды айтсам, мен үшін ең маңыздысы жеңіс пен медаль. Осы жолда біз өте көп жұмыс істейміз. Ал менің ең басты арманым, барлық спортшылардікіндей шығар - Олимпиада чемпионы атанып, Президентіміздің қолын алу. Біз үшін барлық жағдай жасалып жатыр. Мен ауылда туып-өстім, спортпен шұғылдануға, әлемді көруге, чемпион атануға мүмкіндік берген Президентімізге рақмет. Маған бұдан басқа ештеңе керек емес.
Айта кетейік, болашақ әлем чемпионы алғаш рет жарыс жолына 8 жасында шыққан. Сол кездің өзінде ол 50 келіні көтеріп, өз қатарластарынан ғана емес, Қазақстан чемпионатының жасөспірімдер санатындағы өзге қатысушыларынан да басым түскен болатын.
- Бұл турнирге жеке бапкеріңсіз бардың. Бұл сенің өнеріңе қаншалықты әсер етті?
- Әрине, қасыңда жеке бапкерің болғаны жақсы. Бірақ, жалпы алғанда, бұдан ешқандай күрделі мәселе туындаған жоқ.
Нұржан Алматы облысының Қараой ауылында бапкер Азамат Нұроллаевтың қол астында жаттығады. Болашақ чемпионның дайындық барысы туралы осыдан екі жыл бұрын тілшіміз сюжет түсірген болатын.
Чемпионның болашағы – Олимпиада жолдамасы үшін бақ сынайды
Әуежайда спортшыларды ауыр атлетикадан Қазақстан ұлттық құрамасының бапкері Дәурен Бекмұханбетов күтіп алды. Оның айтуынша, жасөспірімдер арасындағы жаңа чемпионды ұлттық құрамада өте жоғары бәсекелестік күтіп тұр.
"Жігіттеріміз әлі өте жас. Нұржан 88 келіге дейінгі салмақ дәрежесінде өнер көрсетті, бірақ 1 тамыздан бастап бізде жаңа салмақ санаттары болады. Ол 85 келі салмақта бақ сынайтын шығар, ал бұл санатта бәсекелестік өте жоғары.
Онда Едіге Емберді сияқты әлем чемпиондары, Азия ойындарының жүлдегері Саша Уваров, ересектер арасындағы Әлем чемпионатының жүлдегері Алексей Чуркин бар. Бәсеке өте үлкен, бірақ Нұржанның басты артықшылығы – оның жастығы мен әлеуетінің зор екендігінде. Негізінен, біз оны алдағы олимпиадалық циклге үміткер ретінде қарастырамыз", - деді тәлімгер.
Айта кетейік, келесі жазғы Олимпиада ойындары 2028 жылы өтеді. 2026 жылдың күзінде алғашқы лицензиялық жарыстар басталады.
15 жастағы қазақстандық ауыр атлетикадан әлемдік рекорд орнатты
+7 (777) 001 44 99
