+7 (777) 001 44
99
Туризм және спорт министрлігі елде бес жаңа стадионның қашан пайда болатынын айтты. Олардың қатарында сыйымдылығы жағынан рекордтық көрсеткішке ие болуы тиіс бірнеше арена бар, - деп хабарлайды Tengri Sport.
Ведомствоның мәліметінше, қазіргі таңда Қазақстанда 13 жаңа арена салу бойынша жұмыстар жүргізіліп жатыр. Оның алтауында құрылыс жұмыстары басталып кетсе, қалған 7 нысан бойынша жобалау-сметалық құжаттама әзірленіп жатыр.
Астанадағы жаңа стадион маусым айында ашылады
Биылдың өзінде Астанада Мұңайтпасов атындағы стадион ашылады - 3,6 мың адамға арналған аренаға 17 миллиард теңге жұмсалды. Әкімдік стадионның ашылуын 4 маусымға жоспарлап отыр.
Елорда әкімдігінің ақпараты бойынша, арена "№8 олимпиадалық резервтің мамандандырылған балалар мен жасөспірімдер спорт мектебінің" теңгерімінде болады.
Үлкен стадиондар қашан пайда болады?
Еске сала кетейік, қазіргі уақытта еліміздегі ең үлкен стадион - 30 мың адамға арналған "Астана Арена".
Қазақстанның бірден үш қаласында - Алматы, Ақтөбе және Шымкентте - сыйымдылығы бұдан да үлкен стадиондар салу жоспарланған.
2025 жылдың қарашасында Ақтөбедегі аренаның жоспар бойынша 35 мың адамды сыйдыратыны хабарланған болатын.
Фото: Ақтөбе облысы әкімдігінің баспасөз қызметі
Осындай сыйымдылық Шымкенттегі жаңа аренада да жоспарланып отыр. Біздің тілшіміз жақында құрылыс алаңында болып, болашақ стадионның алғашқы бейнесін көріп қайтты.
Алматы әкімдігі ақпанда біздің сауалымызға берген жауабында стадион жоспар бойынша 45 мың адамға арналатынын мәлімдеді. Демек, дәл осы қалада еліміздегі ең үлкен арена бой көтеруі тиіс.
Фото: алдын ала эскиз, өзгерістер болуы мүмкін, Алматы әкімдігі
Туризм және спорт министрлігінің мәліметінше, бұл қалаларда, сондай-ақ Атырау мен Семейде құрылыс жұмыстары жүріп жатыр.
Бұл ареналардың ашылуы 2028 жылдың желтоқсанына жоспарланған.
Құрылысты қаржыландыру және басқа да стадиондар
Туризм және спорт министрлігінің ақпараты бойынша, жаңа стадиондар құрылысын қаржыландыру көзі ретінде жергілікті бюджет, республикалық бюджет және жеке инвестициялар қарастырылған. Сонымен қатар ведомство ареналардың нақты құнына қатысты сұраққа жауап бермеді.
Құрылысы жүріп жатқан 6 стадионнан бөлек, тағы 7 арена бойынша жобалау-сметалық құжаттама (ЖСҚ) әзірленіп жатыр. ЖСҚ дайын болғаннан кейін қаржыландыру көзі анықталады.
Спорт министрлігінің мәліметінше, жаңа ареналар Петропавл, Ақтау, Қарағанды, Өскемен, Қонаев, Көкшетау және Павлодар қалаларында бой көтереді.
Бұл ретте, жыл басындағы осындай сауалға ведомство Таразды да атаған болатын, бірақ енді ол Қонаевпен алмастырылған.
Тәуелсіздік алғалы бері Қазақстанда қанша стадион салынды?
Еске сала кетейік, Тәуелсіздік алғаннан бері Қазақстанда үш стадион салынды: "Астана Арена", "Түркістан Арена" және Қызылордадағы "Қайсар Арена". Төртіншісі - құрылысы іс жүзінде аяқталған Мұңайтпасов атындағы стадион болмақ.
Айта кетейік, ресми мәліметтер бойынша, 30 мың орындық "Астана Арена" құрылысына 182 миллион доллар жұмсалған.
Мұңайтпасов атындағы стадионның құрылысына одан 10 есе аз сыйымдылық үшін шамамен 36 миллион доллар бөлінген.
Фото © Tengrinews.kz / Маржан Қуандықова
Қызылордадағы 11 мың адамға арналған "Қайсар Арена" бюджетке шамамен 44 миллион долларға шыққан.
Фото: Ақорданың баспасөз қызметі
Еске сала кетейік, елдегі футбол инфрақұрылымының жағдайына Қазақстан Президенті Қасым-Жомарт Тоқаевтың өзі алаңдаушылық білдірген болатын.
2025 жылдың жазында Бурабайда өткен IV Ұлттық құрылтайда сөйлеген сөзінде Тоқаев өңірлердегі футболды дамытуға ерекше көңіл бөлу қажеттігін атап өтті.
"Облыстық стадиондардың көпшілігін қайта жаңғырту керек немесе демеушілік қаражатты тарта отырып, жаңа футбол стадиондарының құрылысына кірісу қажет. Әрбір облыс, аудан орталығында, кенттер мен ауылдарда балалар футбол алаңдары пайда болуы тиіс. Бұл - алдағы екі жылға арналған міндет. Оның орындалуын тексереміз", - деді Президент.
