Қазақстандық әлем чемпионы бокстан ұлттық құрамаға Азиададағы алғашқы жеңісті сыйлады

Азияданың 1/8 финалында Қазақстанның екі дүркін әлем чемпионы үндістандық боксшы Сакшимен кездесті.

Бірінші раундта үндістандық боксшы бастаманы өз қолына алды. Сакши жақын қашықтықтан шабуылдап, арақашықтықты тез азайтып отырды. Дегенмен, Балқыбекова қарсыласының мәнеріне бейімделіп, өз қарқынын тапты. Төрешілердің шешімімен бірінші раундта қазақстандық спортшы басым түсті - 3:2.

Екінші раундта Балқыбекова бірінші болып жұмыс істей бастады. Қазақстандық боксшының жекелеген соққылары мен комбинациялары нысанаға жиі дөп тиді. Сакши шегіне жүріп шабуылдауға және джеб арқылы қашықтықты бақылауда ұстауға тырысты. Төрешілер бұл кезеңде де қазақстандықты мықты деп таныды - 3:2.

Үшінші кезең үндістандық спортшы үшін сәттірек өтті. Сакши ақырғы раундқа барын салып, қазақстандықты шаршы алаңның шетіне ығыстырды. Ал Балқыбекова тағы ыңғайын тауып, шегіне жүріп жасаған соққыларымен ұпай жинады.

Үш раундтың қорытындысы бойынша Алуа Балқыбекова 3:2 есебімен жеңіске жетті.

Еске сала кетейік, бұған дейін 1/8 финалда Қазақстан ерлер құрамасының өкілі, танымал боксшы Төрехан Сабырхан айқын басымдықпен жеңіске жетіп, Азияданың ширек финалына шыққан болатын.

Алуа Балқыбекова - екі дүркін әлем чемпионы

Қазақстандық боксшы екі бокс ұйымының - World Boxing және IBA нұсқалары бойынша әлем чемпионы. Ол 2025 жылдың наурызында Сербияның Ниш қаласында 50 келіге дейінгі салмақта IBA әлем чемпионы атанды.

World Boxing желісі бойынша Балқыбекова титулды былтыр қыркүйекте Ливерпульде (Англия) жеңіп алған болатын.

Қазіргі уақытта Қазақстан құрамасы Азиаданың медальдар кестесінде 4-орында тұр. Ұлттық құрама қоржынында 8 алтын, 6 күміс және 9 қола медаль бар.

“Командам мен елімді мақтан тұтамын“ – қазақстандық Азиададағы тарихи жеңіс туралы

Абдурашид Абдуллаев ушудан Азия ойындарының күміс жүлдегері атанды