“Командам мен елімді мақтан тұтамын“ – қазақстандық Азиададағы тарихи жеңіс туралы

Фото: ҚР ҰОК

Қазақстандық ескекшілер Владислав Яковлев пен Иван Чернухин 2026 жылғы Азия ойындарындағы жеңістері туралы пікір білдірді. Қазақстандық дуэттің алтыны ел тарихындағы академиялық ескек есуден алғашқы жүлде болды, деп хабарлайды Tengri Sport ҰОК баспасөз қызметіне сілтеме жасап.

Қазақстандық экипаж академиялық ескек есудің "ерлер арасындағы тіреуішсіз жұптық" сайысында жеңіске жетті.

"Әрине, қазір ұзақ уақыт бойы ұмтылған мақсатымызға жеткенімізге қуаныштымын, жеңілдеп қалдым. Өзімді, командамды және елімді мақтан тұтамын. Бұл өте жағымды сезім. Алғашқы мың метрден кейін қашықтықтың жартысы айтарлықтай жеңіл өтті. Қарсыластарымызды қуып жете бастағанда, күш-қуатымыздың жоғары нәтижемен мәреге жетуге жететіні анық болды. Біз бұған дайын едік, осыған ұмтылдық. Барлық жұмыс жоспарланғандай атқарылды", - деді Яковлев жеңістен кейін.

Ескекшінің айтуынша, бұл зор жетістіктің бір себебі – құрамаға жаңа кеңесшінің келуі.

"Мен үшін бұл бесінші Азия ойындары. Осыған дейін төрт рет "алтын" ала алмаған едім. 2014 жылы Инчхонда қола медаль иелендім. Кейін жекелей сында өнер көрсетіп, бірнеше рет тұғырға жақын тоқтадым. Сондықтан қазір, бесінші Азия ойындарында "алтын" жеңіп алу өте жағымды. Қазір бізде кеңесші пайда болды. Меніңше, біз дұрыс жұмыс істей бастадық, нәтижесі міне", - деп атап өтті спортшы.

Иван Чернухин бұл марапаттың ол үшін қаншалықты маңызды екенін айтып берді.

"Ең бастысы, қайықта абыржуға бой алдырмау болды. Әрқайсымыз қалыпты қарқынмен мәреге жету керектігін түсіндік. Мен үшін бұл медальдің орны бөлек. Мен Оралданмын, кішкентай ауылда туып-өстім. Алтын медальмен үйге, туған-туыстарыма бара жатқанымды көз алдыма елестеттім. Маған бүкіл ауылдастарым, жақындарым, көршілерім жанкүйер болған сияқты. Қазір телефон құттықтаулардан тынбай жатыр", - деді ол.

Еске сала кетейік, Яковлев пен Чернухин жұбының алтыны Қазақстан құрамасы үшін Жапонияда өтіп жатқан XX жазғы Азия ойындарындағы сегізінші жүлде болды.