Қазақстандық дербиде WTA әлемдік рейтингіндегі бірінші орынның тағдыры шешілмек

Фото © Tengrinews.kz / Тұрар Қазанғапов

Қазақстандық теннисші Елена Рыбакина Токиодағы турнирде отандасы Юлия Путинцеваны жеңсе, бұл жыл қорытындысы бойынша әлемдік рейтингтегі бірінші орнын сақтап қалатнына кепілдік береді, деп хабарлайды Tengri Sport WTA баспасөз қызметіне сілтеме жасап.

WTA 500 турнирінің 1/8 финалындағы Рыбакина мен Путинцева арасындағы матч әлемдік рейтингтің көшбасшысы атану жолындағы шешуші ойын болуы мүмкін. WTA баспасөз қызметінің мәліметінше, Еленаға кем дегенде қаңтарға дейін рейтинг шыңында қалу үшін бір жеңіске жету жеткілікті.

"Australian Open және US Open турнирлерінің қазіргі чемпионы өмірінде алғаш рет жыл қорытындысы бойынша әлемдік рейтингте бірінші орынға табан тіреу үшін бір ғана жеңіс қашықтықта тұр. Рыбакина қазір Toray Pan Pacific Open Tennis турнирінде бірінші нөмірмен өнер көрсетеді, бұл оған алғашқы айналымнан босатылуға мүмкіндік берді", - деп хабарлады WTA.

Алда Соболенко мен Рыбакинаны Қорытынды турнир ғана күтіп тұр, онда әлемнің бірінші ракеткасы былтырғы жеңісі үшін берілген 1500 ұпайын қорғауы тиіс. Осылайша, турнир басталғанға дейін Еленаның еншісінде Соболенкодан 1500-ден аса ұпай артық болса, бұл жыл қорытындысы бойынша бірінші орынды иеленетініне кепілдік береді.

Жапониядағы қазақстандық дерби

Маңызды матчте Елена Рыбакина мен тағы бір қазақстандық Юлия Путинцева кездеспек. Юлия Токиодағы турнирдің басында экс-әлемнің үшінші ракеткасы грекиялық Мария Саккариді 6:4; 3:6; 6:1 есебімен сенсациялық түрде жеңген болатын.

Айта кетейік, биыл Путинцева мен Рыбакина өзара кездескен - Майамидегі турнирдің екінші айналымында Елена басым түсті (6:3; 6:3).

Бұл ретте олардың текетірес тарихында төрт матч бар және әзірге спортшылар тең тұр - 2:2.

Рыбакина - Путинцева матчі 28 қазанда өтеді. Кездесу болжам бойынша Қазақстан уақытымен сағат 7:00-де басталады.

Instagram-дағы бұл жарияланымды көру

Юлия Путинцеваның (@yulia_putintseva) жазбасы

Рыбакина ұтылып қалса, оған бірінші ракетка атағы үшін бәрібір бір жеңіс қажет болады

Сондай-ақ WTA баспасөз қызметі Путинцевадан жеңілген жағдайда да Рыбакина жыл қорытындысы бойынша рейтингтің бірінші сатысы үшін бәсекеде фаворит бола беретінін есептеді.

"Рыбакина Токиода жеңіске жетпесе де, ол екі аптадан кейін Индиан-Уэллстегі WTA Қорытынды турнирінде бір матчте жеңіске жету арқылы жыл қорытындысы бойынша бірінші орынды қамтамасыз ете алады", - деп атап өтті ұйым.

Елена Рыбакина әлемнің үздік теннисшісі мәртебесіндегі алғашқы турнирін жеңіп алды

Еске салсақ, Елена Рыбакина өткен аптада Нинбодағы (Қытай) WTA 500 турнирінде жеңімпаз атанды. Ол былтырғы титулын қорғап, әлемдік рейтингтің ең жоғарғы сатысына көтерілгеннен кейін алғаш рет олжаға қол жеткізді.

Қазір Елена Рыбакинаның WTA рейтингінің бірінші сатысында тұрғанына жетінші апта болды. Қазақстандық спортшы US Open турниріндегі жеңісінен кейін 14 қыркүйекте алғаш рет тізімнің көшін бастады.