Қазақстан футбол федерациясы (ҚФФ) "Хан Тәңірі" футбол клубына айыппұл салды, деп хабарлайды Tengri Sport.
ҚФФ баспасөз қызметінің хабарлауынша, Бақылау, тәртіп және этика комитетінің отырысында "Хан Тәңірі" клубына қатысты іс қаралды.
Клуб өкілдері қызметтік тексеріс кезінде УЕФА-ның "С" санатындағы жаттықтырушылық лицензиясын растау үшін жалған құжаттарды пайдаланды деген күдікке ілінген.
Дереккөз мәліметінше, клуб ҚФФ өкімін орындамаған, тексеріс жүргізуге кедергі келтірген және тексеруші органдармен ынтымақтастықтан бас тартқан.
"ҚФФ Тәртіптік регламентінің 61-бабы 1-тармағына сәйкес клубқа 50 АЕК (215 мың теңге – ред.) көлемінде айыппұл салынды. Айыппұл 14 мамырға дейін төленуі тиіс", - делінген ҚФФ хабарламасында.
Клубқа белгіленген мерзімде ҚФФ-ның жарыс қауіпсіздігі және интегрити қызметіне барлық сұралған құжаттар мен жазбаша түсініктемелерді ұсыну міндеттелді.
Шешім орындалмаған жағдайда "Хан Тәңіріне" қатысты ұпайларды шегеру, дивизионды төмендету, сондай-ақ жауапты тұлғалардың футбол қызметімен айналысуына тыйым салу сияқты қосымша санкциялар қолданылуы мүмкін.
+7 (777) 001 44 99
