Қазақстандық хоккейшінің жары ойыншының жаңа келісімшарты туралы пікір білдірді

"Барыс" капитаны және хоккейден Қазақстан құрамасының ойыншысы Кирилл Савицкийдің жұбайы күйеуінің жаңа келісімшартсыз қалғанына қатысты пікір білдірді, деп хабарлайды Tengri Sport әлеуметтік желілерге сілтеме жасап.

Әлеуметтік желілерді белсенді жүргізіп, жұбайына қолдау көрсетіп жүретін Ксения Савицкая Кириллмен әлі жаңа келісімшарт жасалмағаны туралы жаңалықтан кейін жанкүйерлерді сабырға шақыруға тырысты.

Оның айтуынша, хоккейші дәл қазір команда ауыстыруды жоспарлап отырған жоқ.

"Ұйқыдан оянсам, сіздерден көптеген хабарлама келіпті. Бізде қолданыстағы келісімшарт шынымен аяқталды. Қазір келіссөздер жүріп жатыр, шешімдер қабылданып жатыр. Біз әлі кеткен жоқпыз және "Барыстан" ешқайда кетпейміз де. Достар, ресми жаңалықтарды күтіңіздер", - деп мәлімдеді ол әлеуметтік желіде.

Еске сала кетейік, 1 маусымда Құрлықтық хоккей лигасы шектеусіз еркін агенттер тізімін жариялаған болатын, оған "Барыстың" бірден 23 ойыншысы енді.

Келісімшартсыз қалған ойыншылардың арасында команда капитаны Кирилл Савицкий мен клуб аңызы Роман Старченко бар.

Клуб тізімдегі барлық ойыншыларға қатысты мәлімдеме жасады, бірақ келісімшартты ұзарту бойынша келіссөздер жүріп жатқан спортшылардың аты-жөнін нақтыламады.

"Келісімшарт мерзімі аяқталғаннан кейін "шектеусіз еркін агент" мәртебесінде жүрген кейбір ойыншылармен клуб келіссөздерді жалғастырып жатыр", - делінген баспасөз қызметінің хабарламасында.

Кирилл Савицкий мен оның жұбайы - лигадағы басты хоккейлік жұптардың бірі

Кирилл мен Ксенияның 13 жылдан бері бірге. Олар 2019 жылы некелерін ресми түрде қиды. Ол кезде Савицкий әлі өскемендік "Торпедоның" ойыншысы болатын.

"Барыспен" келісімшартқа отырғаннан кейін бірнеше жыл өткен соң, жұптың ұлы дүниеге келді.

Ксения Савицкая - әлеуметтік желілерді белсенді жүргізетін және хоккейшінің Қазақстандағы өмірінен сәттерді көрсетіп отыратын блогер. Қазіргі таңда оның Instagram-дағы оқырмандар саны күйеуінің оқырмандарына қарағанда көп.