Қазақстандық қақпашы сенсациялық жеңістен кейін командаластарына тап берді

"Каспий" қақпашысы Дінмұхаммед Жомарт "Астанаға" қарсы матчтың соңында өз командасының ойыншыларымен жанжалдасып қалды. Команда күтпеген жерден жеңіске жетті, ал қақпашы 11 метрлік соққыны қайтарды, деп хабарлайды Tengri Sport.

Ақтау мен Астана командалары арасындағы Қазақстан чемпионатының матчы Қызылордадағы жаңа "Қайсар Аренада" өтті. "Астанамен" кездескенге дейін бірде-бір рет жеңіске жетпей, соңғы орында тұрған "Каспий" бұл ойында анық аутсайдер саналған болатын.

Кездесудің 18-минутында-ақ Әлібек Қасым алаңнан қуылып, "Астана" аз ойыншымен қалды. Соған қарамастан, елордалық команда қысым көрсетіп, 84-минутта пенальти тебу мүмкіндігін алды.

11 метрлік соққыны Башич орындауға шықты, бірақ Дінмұхаммед Жомарт соққыны қайтарып, командасына тең ойыннан үміт сыйлады.

95-минутта "Каспий" жеңісті жұлып алды – команда қарсы шабуылға шығып, 35 метрден бағытталған соққыдан кейін доп "Астана" қорғаушысына тиіп, қақпаға енді.

"Астана" тіпті гол жіберіп алғаннан кейін де есепті теңестіре алар еді, бірақ доп қақпаға кірмеді. Қонақтардың кезекті шабуылынан кейін, финалдық ысқырыққа бірнеше секунд қалғанда, "Каспий" қақпашысы капитан Амандық Нәбихановқа және португалиялықтар Бернардо Маоргадо мен Андре Амаралға ашуланып, айқай салды.

Матч 1:0 есебімен "Каспийдің" пайдасына аяқталды. Команда турнирлік кестеде соңғы орында қалды, ал "Астана" көш бастап тұрған "Қайрат" пен "Ордабасыдан" алты ұпай қалып қойып, алтыншы сатыға түсті.