Қазақстандық мергендер 2026 жылғы Азиада тұғырына көтерілді

Даниил Почивалов, Әлішер Айсалбаев және Марк Почивалов. Фото: ҰОК/ Сәли Сабиров

Жапонияның Айти және Нагоя қалаларында өтіп жатқан 2026 жылғы Азия ойындарында стенд атудың "трап" бағдарламасы бойынша командалық жарыста Қазақстан ерлер құрамасы қола медаль иеленді, деп хабарлайды Tengri Sport.

Қазақстандық спортшылар 348 ұпай жинап, үшінші орынға табан тіреді.

Ұлттық құрама сапында Даниил Почивалов, Әлішер Айсалбаев және Марк Почивалов өнер көрсетті.

Жарыста 355 ұпай жинаған Кувейт құрамасы жеңіске жетті. Күміс медаль Қатар командасына (349 ұпай) бұйырды.

Стенд атудағы қола жүлдеден кейін Қазақстан 2026 жылғы Азия ойындарының медальдар кестесінде бесінші орында тұр. Құрама қоржынында 9 алтын, 13 күміс және 24 қола медаль бар.

Айта кетейік, XX жазғы Азия ойындары 4 қазанға дейін жалғасады. Қазақстан ұлттық құрамасы сапында 558 спортшы спорттың 35 түрінен бақ сынап жатыр.