+7 (777) 001 44
99
Қостанайлық команда үшін еуромаусымдағы алғашқы матч қонақта өтеді. Паневежиске дейінгі жол оңай болған жоқ - әлеуметтік желілерде жоспарланған чартердің орнына команданың бірнеше рейспен ұшуына тура келгені хабарланды.
"Мұнда келу оңай болмады, логистика айтарлықтай күрделі болды, бірақ бұл біз үшін ақталуға себеп болмауы тиіс", - деді ойын алдындағы баспасөз мәслихатында жаттықтырушының ассистенті Гинтарас Стауче.
Instagram-дағы бұл жарияланымды көру
"Тобылдың" қарсыласы туралы не белгілі?
Литвалық ұжым 2015 жылы ғана құрылғанына қарамастан, тез арада жергілікті чемпионаттың көшбасшыларының біріне айналды. 11 жыл ішінде команда қоржынында екі кубок, бір чемпиондық атақ және еуропалық іріктеу кезеңдеріндегі бірнеше жеңіс бар.
2024/2025 маусымында команда алғаш рет Чемпиондар лигасының іріктеуіне қатысып, бастапқы кезеңде финдік ХИК-тен басым түсті. Нәтижесінде Конференция лигасының ортақ кезеңіне шығу үшін келесі кезеңдердің бірінде тағы бір жеңіс жетпей қалды.
Команда үшін чемпионаттағы өткен маусым сәтсіз болды - 10 ұжымның ішінде тек 8-орынға табан тіреді. Алайда олар еурокубоктарға "Тобыл" секілді ел кубогының иегері ретінде жолдама алды.
Transfermarkt мәліметінше, команданың басты жұлдызы деп Матас Раманаускасты айтуға болады - жартылай қорғаушы 500 мың еуроға бағаланып отыр.
Instagram-дағы бұл жарияланымды көру
"Тобыл" - Қазақстандағы еурокубок иегері атанған жалғыз клуб
Қостанайлықтар - еуропалық аренада ысылған ұжым. Олар Еуропада 2003 жылдан бері өнер көрсетіп келеді, ал 2007 жылы тарихи жетістікке қол жеткізді - чехиялық "Слован" мен грекиялық ОФИ-ді жеңіп, Интертото кубогын иеленді.
Сол жылы бұл жарыста бірден 11 команда жеңімпаз атанды, олардың қатарында "Атлетико Мадрид" пен "Лион" сияқты грандтар болды.
2023/2024 маусымында "Тобыл" Конференция лигасының ортақ кезеңіне шығуға бір қадам қалғанда тоқтады - іріктеуде швейцариялық "Базельді" сенсациялық түрде қапы қалдырғанымен, чехиялық "Викториядан" өте алмады.
Instagram-дағы бұл жарияланымды көру
"Паневежис" - "Тобыл": тікелей трансляция
"Тобылдың" жаңа еурокубок маусымындағы алғашқы ойыны Қазақстан уақытымен 20:30-да басталады.
Матчті Qazsport арнасы тікелей эфирде көрсетеді, сондай-ақ арна сайты арқылы да онлайн көруге болады.
Бұған дейін Чемпиондар лигасы іріктеуінің екінші кезеңіндегі алғашқы матчте алматылық "Қайрат" кипрлік "Омониядан" жеңілді.
Алматылықтардың бас бапкері Рафаэль Оразбахтин ойынға қарсылас сапындағы ойыншының алаңнан қуылғаны туралы пікір білдірді.
