Қазақстанның Еуропадағы шешуші матчтері: қайдан көруге болады?

Алғашқы матчтерден кейін "Астана" албаниялық "Динамо Ситиден" 1:0 есебімен басым түссе, "Елімай" армениялық "Алашкертпен" 1:1 есебімен тең тарқасты. Қазақстанның қос командасы да қарымта ойындарын өз алаңында өткізеді.

"Елімай" - "Алашкерт": тікелей трансляция

Еске сала кетейік, алғашқы матчте "Елімай" бір гол басымдығын сақтай алмай, жарақат салдарынан өз көшбасшысы Рамазан Оразовтан айырылып қалған болатын.

Бұған қоса, матч соңында стадионда жарық сөніп қалды.

"Стадионда электр жарығы сөнген бойда, албаниялық матч делегаты Энди Зере УЕФА-мен байланысқа шығып, шұғыл комиссия жинады. Матч төрешісі 10 минут уақыт беріп, одан кейін ойынды мерзімінен бұрын аяқтағысы келді. Алайда 6-7 минуттан соң электр қуаты қалпына келтірілді. Бұл жайт, әрине, матч делегатының рапортында тіркелді", - деп хабарлады Tengri Sport-қа клуб баспасөз қызметі.

Қарымта кездесу Семейде өтіп, бүгін сағат 20:00-де басталады. Кез келген жеңіс "Елімай" үшін тарихи болмақ, өйткені клуб еуропалық аренада алғаш рет өнер көрсетіп жатыр.

Матч трансляциясы Qazsport-та, сондай-ақ арна сайтында болады.

"Астана" - "Динамо Сити": қайдан көруге болады?

Елордалық команда сырт алаңда өз тәрбиеленушісі Рамазан Кәрімовтің голы арқасында 1:0 есебімен жеңіске жетті.

"Астана-Аренадағы" матч та сағат 20:00-де басталады. Оны Qazaqstan мен арна сайты тікелей эфирде көрсетеді.

Бұған дейін алматылық "Қайрат" Черногорияның "Сутьескасын" жеңіп, Чемпиондар лигасы екінші іріктеу кезеңіне жолдама алды.