Қазақстанның тарихи әлем чемпионы үздік спортшы деп танылды

Халықаралық күрес федерациясы қазақстандық еркін күрес шебері Ризабек Айтмұқанды әлем бойынша айдың үздік спортшысы деп таныды, деп хабарлайды Tengri Sport.

Халықаралық күрес федерациясының баспасөз қызметі қазақстандық әлем чемпионы Ризабек Айтмұқанды өткен айдың үздік еркін күрес шебері деп таңдады. Грек-рим күресі өкілдерінің арасында Армениядан келген U-17 Еуропа чемпионы Джанес Назарян үздік атанса, әйелдер арасында Панамерикалық ойындардың екі дүркін чемпионы Кайли Уэлкерге басымдық берілді.

Еске сала кетейік, Ризабек Айтмұқан жақында ғана 23 жасқа дейінгілер арасындағы Азия чемпионатында бақ сынап, 125 келіге дейінгі салмақ дәрежесінде жеңіске жетіп, алтын медаль иеленген болатын.

Азия чемпионатының финалында ол үндістандық палуан Лакимен кездесті. Жекпе-жек Ризабек Айтмұқанның пайдасына 10:0 есебімен мерзімінен бұрын аяқталып, қазақстандыққа алтын медаль сыйлады.

Ризабек Айтмұқан - тарихи әлем чемпионы

Ризабек Айтмұқан 2023 жылы еркін күрестен әлем чемпионы атағын жеңіп алған алғашқы қазақстандық атанғанын айта кеткен жөн. Сол кезде 18 жасар балуан 92 келіге дейінгі салмақ дәрежесінде өнер көрсеткен болатын.

Кейін Ризабек салмақ дәрежесін ауыстырды, себебі 97 келіге дейінгі салмақ - олимпиадалық санатқа жатады. Бұл салмақта қазақстандық балуан Азия чемпионатының күміс жүлдесін екі рет иеленді.