Қазақша
Русский
Ертең, 20 тамызда, алматылық "Қайрат" Еуропа лигасы іріктеу кезеңінің плей-офф раундында ойнайды. Команданың бас бапкері Рафаэль Оразбахтин америкалық рэпер Канье Уэстің ауқымды концертінен кейін алаңның жай-күйі туралы айтып берді. Біз де оқиға орнына барып, көгалдың қазіргі түрін көріп қайттық, деп хабарлайды Tengri Sport.
Матч қарсаңында әлеуметтік желілерде сенбі күні дүбірлі концерт өткен "Орталық" стадион көгалының фотолары мен видеолары пайда болды. Желі қолданушыларының басым көпшілігі оның жағдайы көңіл көншітпейтінін атап өтті.
"Мен көгалды әлі көрген жоқпын, тек агрономымыз көрсеткен фотоларды ғана көрдім. Оның айтуынша, жалпы алғанда жағдайы тәуір. Жеті күн бойы төсеніш астында жоғары температура болғандықтан, шөп сәл сарғайған. Кей жерлері күйіп кеткен. Бірақ жалпы алғанда жаман емес", - деп мәлімдеді алматылықтардың бапкері баспасөз мәслихатында.
Еске сала кетейік, Еуропа лигасының шешуші кезеңінде турнирдің ортақ кезеңіне жолдама алу үшін "Қайрат" Бельгияның ең титулды клубы – "Андерлехтпен" кездеседі.
Стадион әкімшілігі көгалдың жағдайына баға беруге әлі дайын емес
Канье Уэстің концертінен кейінгі алаңның алғашқы кадрлары пайда болған соң, біз Алматы қаласының спорттық нысандар дирекциясына сауал жолдадық.
"19 тамыздағы жағдай бойынша, Орталық стадионда концерттік іс-шарадан кейін футбол алаңын қалпына келтіру жұмыстары жалғасып жатыр.
Стадион мамандары күн сайын көгалды қалпына келтіру үшін қажетті жұмыстарды – шөп шабу, аэрация, тесу, қосымша шөп егу және күшейтілген суару шараларын жүргізіп жатыр. 20 тамызда өтетін алдағы матчті ескере отырып, жұмыстар жеделдетілген режимде атқарылып жатыр", - делінген дирекция жауабында.
Олардың мәліметінше, қазір мамандар алаңды дайындауды жалғастырып жатыр. Көгалға түпкілікті баға тікелей матч алдында беріледі.
Матч қарсаңында көгалдың түрі қандай?
Tengri Sport тілшілері стадионға барып, көгалдың жай-күйін бағамдап қайтты.
Футбол алаңы біртіндеп үйреншікті қалпына келтіріліп жатқанын көруге болады. Көгалға таңбалар сызылып, қақпалар орнатылған. Сонымен қатар жабын бетінде техника жұмысының іздері әлі де байқалады, ал көгалдың бір бөлігі сарғайып кеткен.
Қазір стадионға еркін кіруге болмайды. Аумақта жұмыстар әлі де жүріп жатыр.
Жүгіру жолақтарының жанында арнайы техника жұмыс істеп тұр. Жұмысшылар шоудан қалған уақытша конструкциялар мен қоршауларды бөлшектеп, аренаны ретке келтіруді жалғастырып жатыр.
Трибуналар мен шығар берістерге "Қайрат" ойыншыларының портреттері бейнеленген баннерлер ілінген.
"Қайрат" - "Андерлехт": басталу уақыты
Еске сала кетейік, "Қайрат" пен "Андерлехт" арасындағы Еуропа лигасының матчі 20 тамызда "Орталық" стадионда өтеді.
Ойынның басталуы 20:00-ге жоспарланған. Матчті QazSport телеарнасы тікелей эфирде көрсетеді.
Концерт және "Қайрат" матчі
Канье Уэсттің Алматыдағы концерті 17 шілдеде жарияланды, бірақ бірден өткізу орнына қатысты мәселе туындады. Орталық стадион – "Қайрат" футбол клубының үй аренасы, ал команда тамыз айында еурокубоктардағы өнерін жалғастырып жатқан болатын.
Клуб өкілдері концерт күні олармен келісілмегенін мәлімдеді. Сонымен қатар "Қайрат" тарапы үлкен сахнаны құру және бөлшектеу жұмыстары футбол алаңына зақым келтіруі мүмкін деп қауіптенген.
Даудың салдарынан ұйымдастырушылар тіпті билеттердің сатылымға шығуын бір күнге шегерді – 20-сынан 21-ші шілдеге қараған түні.
Нәтижесінде стадион бәрібір Канье шоуына берілді. "Қайрат" УЕФА-ға еурокубоктық үй матчын ауыстыру туралы өтініш білдіріп, ойынды "Түркістан Аренада" өткізу келісілген болатын.
Алматыда Канье Уэстің концерті қалай өтті?
Бастапқыда Канье Уэстің Орталық стадиондағы концерті 14 тамызда өтуі тиіс еді. Алайда өнер көрсететін күні Алматы алдымен жаппай жарықсыз қалу (блэкаут) жағдайына тап болды, ал кешке қарай қалада қатты жел соғып, нөсер мен найзағай басты.
Ауа райының қолайсыздығына қарамастан, көрермендер стадионға келіп, шоудың басталуын күтті. Бірақ әртіс сахнаға шығардан бірнеше минут бұрын ұйымдастырушылар концерттің келесі күнге – 15 тамызға ауыстырылғанын хабарлады. Бұл шешім қауіпсіздік мақсатымен түсіндірілді. Кейінірек Канье Уэсттің өзі әлеуметтік желіде концерттің ауа райына байланысты ауыстырылғанын растады.
15 тамызда концерт Орталық стадионда бәрібір өтті.
"Қайрат" Канье Уэстің концертінен кейін стадион бойынша шешім қабылдады
+7 (777) 001 44 99
