“Көзілдірік керек пе“: “Барыс“ КХЛ-дағы даулы төрелік туралы сұраққа жауап берді

Қазақстандық команда үшінші кезеңдегі басымдықты сәтті пайдаланып, 4:1 есебімен жеңіске жетті. Алайда жанкүйерлердің пікірінше, қарсылас ойыншыларын алаңнан ертерек те қууға болатын еді.

Мәселен, екінші кезеңнің басында Әлихан Өмірбековтің аяғынан шалып жіберді, ол жоғары жылдамдықпен қақпа бағанына соғылды.

Қазақстандық хоккейші жарақат алып, тек үшінші кезеңде ғана оралды. Төреші бұл эпизодты назардан тыс қалдырды.

"Барыс" жанкүйерлері бұған жедел жауап қайтарды - трибуналарда танымал "Очки ннада?" меміне ұқсайтын плакат пайда болды, бұл "Барыс" ойындарындағы төрешілердің көру қабілетіне жасалған ишара еді.

Фото: TengriSport.kz/ Антон Алексеев

Дінмұхамед Қайыржан серіктесінің жарақаты мен төрешілер туралы

Ойыннан кейін Tengri Sport тілшісі шайбалардың бірінің авторы Дінмұхамед Қайыржанмен кездесіп, Өмірбековтің жарақаты командаластарына қалай әсер еткенін және команда төрешілік туралы не ойлайтынын білді.

- Сыртынан қарағанда, Өмірбековтің қақпаға соғылып, сәтсіз құлауы командаға қатты әсер еткендей көрінді, команда содан кейін біраз бәсеңдеп қалғандай болды. Расында да солай ма? Бұл жағдай қалай әсер етті және кейін сол эмоционалдық тығырықтан қалай шыға алдыңыздар?

"Иә, әрине. Алекс біз үшін маңызды ойыншы, ол қара жұмысты өте көп атқарады. Оның аяғы тайып кетіп, бағанаға соғылған сәті өте жағымсыз болды. Бәрі жақсы аяқталды, әйтпесе, айтқандай-ақ, ауыр жарақат алуы мүмкін еді. Қазір бәрі жақсы", - деп жауап берді Қайыржан.

- Төрешілік туралы не айта аласыз? Жанкүйерлер бұл туралы көп айтып, "Очки ннада" деген сияқты плакаттар көрсетіп жатыр. Бүгін де сондай жағдай болды: қарсыластарды ұзақ уақыт бойы алаңнан қумай қойды, ал төрешілер оларды шығарған бойда сіздер басымдықты бірден пайдаландыңыздар. Не ойлайсыз?

"Төрешілерге назар аудармау керек, өйткені біз тек эмоциямыз бен күш-қуатымызды босқа шығындаймыз. Тек хоккей ойнау керек. Бұл жерде қолдан келер шара жоқ. Төрешілер де адам, олар да қателесуі мүмкін", - деді ол.

"Сүңгуді үйрену керек пе?" - "Барыс" бапкері ҚХЛ-дағы жарақаттар мен төрешілер туралы

Сондай-ақ Өмірбековтің жарақаты мен төрешілік мәселесі "Барыс" бапкері Михаил Кравецпен өткен баспасөз мәслихатында да талқыланды.

"Өмірбеков жарайсың, бағанаға соғылған сондай ауыр соққыдан кейін ойынға қайта оралды, жақсы оралды, оның үстіне гол соқты. Бұл команданың бар екенін, команда бір-бірі үшін жұмыс істейтінін және бәрі бірлесіп жеңіске жетуге тырысатынын тағы бір мәрте дәлелдеді. Сондықтан бәріңізді жеңіспен құттықтаймын!" - деп бастады Кравец журналистермен кездесуді.

- Осы "Барыс Аренаның" іргесінде ғана жүзуден Әлем кубогының кезеңі басталып жатыр. Төрешілер біздің ойыншыларға қарсы ереже бұзушылықтарды неге екені белгісіз, көріп тұрса да байқамайды. Мүмкін, сол жаққа барып, "сүңгуді" үйреніп келу керек шығар?

"Білмеймін. Өткен жолы айтқанымдай, бұны қадағалауы тиіс құзырлы органдар бар. Сондықтан бәрі олардың ар-ұжданында", - деп жауап берді бапкер.

Қазақстан үлкен хоккеймен бір айға қоштасады

Айта кетейік, "Автомобилистке" қарсы ойын ұзаққа созылатын сырт айдындағы матчтер алдындағы соңғы үй кездесуі болды. 15 қазаннан бастап "Барыс Арена" жүзушілердің иелігіне берілсе, 26 қазаннан бастап мұз айдыны жекпе-жек алаңына айналады - Астанада күрестен әлем чемпионаты өтеді.

Нәтижесінде команданың келесі үй матчі тек 12 қарашаға жоспарланған. Команда "Адмиралды" қабылдайды.

- Үй ойындарын Қазақстанның басқа қаласында, мысалы, Алматыда ұйымдастыру мүмкін болмағаны өкінішті-ақ. Сіздің ойыңызша: команда үшін өз айдынында өтуі тиіс осы матчтерді Алматыда ойнаған ыңғайлы болар ма еді, әлде қарсыластың алаңында ма?

- Иә, әрине, өз үйіңде ойнаған жақсы. Егер мүмкіндік болса, әрине, Алматыда неге ойнамасқа? Ол да Қазақстан ғой. Біз кейбір ойындарды қуана-қуана өткізер едік.

- Осыған байланысты келесі сұрақ. Мұндай ұзақ сапар кезінде команданың физикалық, тіпті моральдық тұрғыдан зардап шекпейтініне сену өте қиын, өйткені үйден тыс жерде өте ұзақ уақыт болуға тура келеді. Сырт айдындағы матчтер кезінде команда үйге қаншалықты жиі оралып тұрады және команданы мұндай сынаққа дайындау үшін қандай шаралар қолданып жатырсыздар?

- Кесте бойынша біз үш ойын ойнаймыз, сосын үйге ораламыз, содан кейін екі күн демалыс болады. Әр сериядан кейін осылай: ойнаймыз, сосын екі жаттығу - және қайтадан жолға шығамыз. Яғни, біз бәрібір үйге ораламыз, өйткені отбасымызға бару керек, жігіттер Астанаға келіп, эмоционалдық тұрғыдан күш жинауы қажет. Оған қоса жаттығуға мүмкіндік бар. Алда өте ауыр серия күтіп тұр. Бірақ әр ойынға деген жігерімізді сақтап қалу үшін қолдан келгеннің бәрін жасаймыз, - деді бапкер.

Бұған дейін "Барыс Аренада" өткен жүзуден әлем кубогы кезеңіне қатысушылардың бірі Айбат Мырзамұратов өзі шұғылданатын спорт түрін бокс және күреспен салыстырды.