Құрлықтық хоккей лигасының матчі Қазақстандағы жалпыұлттық аза тұтуға байланысты кейінге шегерілді

Фото © Tengrinews.kz / Эльдар Нұруллин

ҚХЛ тұрақты чемпионатының "Барыс" пен "Нефтехимик" арасындағы ойыны жалпыұлттық аза тұту күніне байланысты 26 қыркүйекке ауыстырылды, - деп хабарлайды Tengri Sport клубтың баспасөз қызметіне сілтеме жасап.

Ойын бүгін сағат 19:00-де басталуы тиіс еді, бірақ сенбі күні күндіз өтетін болды.

"Мемлекет басшысы жариялаған жалпыұлттық аза тұту күніне байланысты 25 қыркүйекке жоспарланған "Барыс" – "Нефтехимик" матчі барлық тараптың келісімімен 26 қыркүйекке ауыстырылды. Кездесу Қазақстан уақыты бойынша сағат 13:00-де басталады", - делінген хабарламада.

Сондай-ақ "Қар барыстары" жастар командасының ойыны да кейінге шегерілгенін атап өткен жөн.

25 қыркүйек Қазақстанда жалпыұлттық аза тұту күні болып жарияланды

Еске салайық, 24 қыркүйекте Маңғыстау облысында әскери-теңіз күштерінің жаттығуы кезінде әскери қызметшілер суға ағып кетті. Төтенше жағдай Каспий теңізінің жағалауында оқу-жауынгерлік тапсырманы орындау кезінде күн райының күрт бұзылуы мен желдің күшеюі салдарынан болған.

Соңғы мәліметтер бойынша 14 адам қаза тауып, үшеуі құтқарылған.

Мемлекет басшысының өкімімен Маңғыстау облысында қызметтік міндеттерін атқару кезінде әскери қызметшілердің қаза табуына байланысты 2026 жылғы 25 қыркүйек Қазақстан Республикасында жалпыұлттық аза тұту күні болып жарияланды.