Махмұд Сабырхан Қазақстанға Азия ойындарының медалін сыйлады

Жартылай финалдық жекпе-жекте екі дүркін әлем чемпионы филиппиндік Карло Пааламмен қолғап түйістірді.

Жекпе-жек барысы

Махмұд Сабырхан алғашқы минуттардан-ақ қыспаққа алды. Отандасымыз қарсыласын арқанға тақап, ұпай санын арттыра түсті. Қарсыласы оған бейімделуге тырысып, Сабырханның комбинацияларынан кейін жекелеген соққылармен жауап берді. Раунд соңында боксшылар ринг ортасына шығып, жақын қашықтықта соққы алмасты. Төрешілер бірінші раундта жеңісті 4:1 есебімен Пааламға берді.

Екінші раундта қазақстандық боксшы қарқынды бәсеңдетпеді. Ол бастаманы өз қолына алып, бірінші нөмірмен жұмыс істеді, соққылар сериясын жасап, қарсыласын ринг шетіне ысырды. Қарсыласы ауыр соққылармен жауап қатып, тіпті қазақстандықты шалып жықты, алайда нокдаун есептелген жоқ. Төрешілер екінші раундта жеңісті 3:2 есебімен Сабырханға берді.

Үшінші кезеңде жекпе-жектің қарқыны барынша артты. Боксшылар ашық айқасқа түсуден тайынбады. Филиппиндік боксшы жалғыз әрі ауыр соққыларға мән берсе, отандасымыз соққыларының жылдамдығы мен дәлдігіне сенім артты. Раундтың аяқталуына 30 секунд қалғанда Сабырхан қарсыласын бұрышқа тықсырып, бірнеше жауапсыз соққылар сериясын жасады. Дегенмен, төрешілер бұл басымдықты жеңіс үшін жеткіліксіз деп танып, жеңісті 3:2 есебімен филиппиндік спортшыға берді.

Осылайша, Махмұд Сабырхан 2026 жылғы Азия ойындарының қола медаль иегері атанды.

Еске сала кетейік, Азиаданың жартылай финалына жолдама беретін бәсекеде Махмұд Сабырхан оңтүстіккореялық Жаенг Шинмен кездескен болатын. Боксшылар жақын және орта қашықтықта нағыз тартысты айқас көрсетті. Сабырхан қарсыласын екі рет нокдаунға түсіріп, 3:1 есебімен жеңіске жеткен еді.

Айта кетейік, әлем чемпионы Алуа Балқыбекова жартылай финалда есе жіберіп, Азиаданың қола медалін иеленді.