Қазақстандық бокстан әлем чемпионы Азиада медалін жеңіп алды

Фото: Қазақстан бокс федерациясы

Бокстан әлемнің екі дүркін чемпионы Алуа Балқыбекова Азия ойындарының жартылай финалында Вьетнам өкілі, Азия чемпионы Ти Та Нгуеннен жеңіліп қалды, деп хабарлайды Tengri Sport.

Жекпе-жек 51 келіге дейінгі салмақ дәрежесінде өтіп, толық уақытқа созылды. Алғашқы және екінші раундтарда төрешілердің көбі вьетнамдық спортшының басымдығын мойындады.

Үшінші раундта да жағдай өзгерген жоқ.

Осылайша, Алуа Балқыбекова Азия ойындарының қола жүлдегері атанды.

Айта кетейік, Алуа Қазақстан боксшылары арасында Азия ойындарының жүлдесіне қол жеткізген алғашқы спортшы болды. Жартылай финалдық кезеңге тек Алуа мен Наталья Богданова ғана жеткен болатын.

Қарсыласына тоқталсақ, Нгуен - Вьетнам тарихындағы бокстан тұңғыш Азия чемпионы.

2 қазанда өтетін финалда вьетнамдық спортшы қытайлық Олимпиада чемпионы У Юмен кездеседі. Ол 2024 жылы Парижде өткен Ойындардың жартылай финалында қазақстандық әлем чемпионы Назым Қызайбайды жеңген болатын.

Балқыбекова - қазақстандық әлемнің екі дүркін чемпионы

Еске сала кетейік, өткен жылы Алуа Балқыбекова екі ұйымның нұсқасы бойынша бокстан әлем чемпионы атанған еді.

Наурыз айында ол Ниште (Сербия) өткен чемпионатта 50 келіге дейінгі салмақ дәрежесінде IBA турнирін жеңсе, қыркүйекте Ливерпульде (Англия) World Boxing турнирінде топ жарды.