Малинин Шайдоровты қолдағаны үшін марапат алды: қазақстандықтың реакциясы

Америкалық мәнерлеп сырғанаушы Италиядағы Олимпиада ойындарында қазақстандық спортшыға қолдау көрсеткені үшін марапатталды.

Сол кезде ол жарыстың фавориті бола тұра еркін бағдарламада сәтсіз өнер көрсетті, бірақ күш тауып, чемпион атанған Михаил Шайдоровты құшақтап, құттықтады.

"Сол өнеріме өткен күннің еншісімен қарасам, бұл өмірімдегі ең қиын сәттердің бірі болды деп ойлаймын. Оны ешқашан ұмытпайтыным анық. Бірақ мен алға жылжу керек екенін, қарсыласым әрі досымды қабылдап, оның жетістігін бағалау қажеттігін түсіндім.

Ол өз олимпиада бәсекесінде жеңіске жетті, оның өз арманын орындап, мақсатына жеткені мені қуантты. Мен оған қолдау көрсетіп, қасынан табылатын жақсы дос болғым келді. Сол кезде мені толғандырған нәрсе осы еді", - деді Малинин 11 қазанда Лозаннада (Швейцария) өткен марапаттау рәсімінде.

Қазақстандық спортшы да Малининнің Олимпиададағы әрекетіне жауап ретінде әлеуметтік желіде оған қолдау білдіріп, алған сыйлығына қатысты пікір қалдырды.

"Илья Малинин, Fair Play сыйлығын алуыңмен құттықтаймын! Досым, мен сені мақтан тұтамын! Сенімен бұл жолды бірге өткеніме өте қуаныштымын, мен сені әрдайым қолдап, әрбір табысыңа шын жүректен қуанамын", - деп атап өтті қазақстандық спортшы.

Фото: instagram.com/mikhail_shaidorov

Айта кетейік, қазір Илья Малинин мен Михаил Шайдоров ISU рейтингінде бірінші және екінші орында тұр.

Олар өздері қатысқан кейінгі төрт ірі додада жеңіске жетті: америкалық спортшы – 2025 және 2026 жылғы әлем чемпионы, ал қазақстандық спортшы – Төрт құрлық чемпионаты мен Олимпиада ойындарының жеңімпазы.

Михаил Шайдоров - Қазақстанның тарихи чемпионы

Айта кетейік, Михаил Шайдоровқа дейін қазақстандықтардың ешқайсысы мәнерлеп сырғанаудан жекелей сында Олимпиада чемпионы атанбаған еді.

Милан мен Кортина-д’Ампеццодағы ойындарда ол қысқа бағдарламадан кейін бесінші орында келе жатқан, бірақ еркін бағдарламаны мінсіз орындап, барлық бәсекелесін, соның ішінде әлемнің қазіргі чемпионы Илья Малининді басып озды.

Олимпиада алтынынан бөлек, Шайдоровтың қоржынында Әлем чемпионатының күміс жүлдесі мен Төрт құрлық чемпионатының жеңісі бар.

“Тұманда жүргендей“ - Михаил Шайдоров Қазақстан Президентімен кездесуі туралы