“Тұманда жүргендей“ - Михаил Шайдоров Қазақстан Президентімен кездесуі туралы

Ақорданың баспасөз қызметінің фотосы

Мәнерлеп сырғанаудан Олимпиада чемпионы Михаил Шайдоров Италиядағы Ойындарда жеңіске жеткеннен кейінгі есте қалған оқиғалардың бірі Қазақстан Президенті Қасым-Жомарт Тоқаевпен кездесу болғанын айтты, деп хабарлайды Tengri Sport "Спортсқа" сілтеме жасап.

Ел тарихында мәнерлеп сырғанаудан алғашқы Олимпиада чемпионын Президент салтанатты жеңісінен екі апта өткен соң Ақордада қабылдады.

Оның айтуынша, Мемлекет басшысының қабылдауында болу ол үшін өте ерекше оқиға болған.

– Миланда жүргенде енді қандай назар аударылатынын түсіндің бе?

– Іштей сездім. Асыға күттім десе де болады. Содан кейін бұл сәттің рақатын сезінуге өзіме мүмкіндік бердім.

Ең есте қалғаны, Президенттің қабылдауы болар. Құрмет қарауылы жанынан тұманда жүргендей өттім, мұның бәрі менімен болып жатқанына сенбей, өзімді шымшып алғым келді. Сондай-ақ бұл әкем мен жаттықтырушым үшін қаншалықты маңызды болғанын білемін. Ол жерде айтылған жылы лебіздер, маған берілген орден – мұның бәрі біз үшін үлкен мәртебе, - деді ол сұхбатында.

Естеріңізге сала кетейік, Мемлекет басшысының қабылдауында Шайдоров ІІ дәрежелі "Барыс" орденімен марапатталған. Президент мәнерлеп сырғанаушының бұл жеңісін Қазақстан 32 жыл күткенін атап өтті.

"Біріншіден, бұл – көптен күткен, яғни, 32 жылдан кейін қол жеткізген тарихи жүлде. Екіншіден, бұл – мәнерлеп сырғанаудан ел қоржынына түскен алғашқы Олимпиада алтыны. Үшіншіден, күллі әлем елімізде әйгілі спортшы Денис Теннің жолын жалғастыратын дарынды жастардың бар екеніне куә болды. Михаил Шайдоровтың Олимпиадада көрсеткен керемет өнері, сөзсіз, тарихи жетістік, нағыз триумф. Кортина д’Ампеццо мұз айдынында отандасымыздың жұлдызы жарқырады. Бұл – Олимпиада чемпионының өзін-өзі шыңдап, өз күшіне сенгенінің, мәнерлеп сырғанау сияқты аса қиын спорт түріне деген ерекше махаббатының жемісі", – деді Президент.

Михаил Шайдоров - Олимпиаданың тарихи чемпионы

Айта кетейік, Михаил Шайдоровқа дейін ешбір қазақстандық мәнерлеп сырғанаудан жекелей сында Олимпиада чемпионы атанбаған.

Милан мен Кортина д’Ампеццодағы ойындарда ол қысқа бағдарламадан кейін бесінші орында тұрған, бірақ еркін бағдарламаны мінсіз орындап, барлық қарсыласын басып озды.

Олимпиада алтынынан бөлек, Шайдоровтың қоржынында Әлем чемпионатының күміс жүлдесі мен Төрт құрлық чемпионатының жеңісі бар.