Гиннес рекордтар кітабы мәліметінше, Шойер 94 жас 75 күнінде 33 шақырым жол жүрген. Бұған дейінгі рекорд Испания тұрғыны Альфредо Ариага Бурдиоға тиесілі еді. Ол осы қашықты 93 жас 60 күнінде жүріп өткен.
Каньон бойындағы қауіпті сапарға шықпас бұрын Эрнест Шойер көп жыл жаяу саяхаттаған. Алайда бұған дейін мұндай күрделі бағыттарды еңсермеген. Соған қарамастан зейнеткер өзі жасаған істі ерекше жетістік деп санамайды.
"Бұл жорық аса қиын болмады. Түскенде де, көтерілгенде де тік жерлер бар. Соқпақтың кей жері тегіс емес, сондықтан аяқ астына қарап жүру керек. Жолдың басым бөлігінде асықпай жүрдім. Бірақ "бір қадамнан кейін тағы бір қадам" деген ұстанымымды ұстанып, сапарды аяқтадым", - деп келтірді Гиннес рекордтар кітабы оның сөзін.
Қария немересі Эрик Арлингтонмен және тағы бес адаммен бірге 33 сағат 45 минутта 33 шақырым жол жүріп, биіктігі үш шақырымнан асатын өр мен ылдиды еңсерген.
"Сапардың соңына жеткенде жағдайым өте жақсы болды. Мақсатыма жететінімді білген соң соңғы бірнеше шақырым өрге қарай жүргенде бойымда күш-қуат көп болды", - деді рекорд иесі.
Бұған дейін Гиннес рекордтар кітабы әлемдегі ең қарт адамның рекордын жаңартқан еді.