“Мен де қосыламын“: Елена Рыбакина жүлде қорына байланысты теннисшілердің бойкоты туралы айтты

Қазақстанның үздік теннисшісі Елена Рыбакина Үлкен дулыға турнирлерінің сыйақы қорына байланысты теннисшілердің бойкотына қатысты пікір білдірді, деп хабарлайды Tengri Sport.

"Ролан Гаррос" Үлкен дулыға турнирінің төңірегінде үлкен дау туындады. Турнир ұйымдастырушылары 2026 жылы жалпы сыйақы қоры шамамен 10 пайызға өсіп, 61,7 миллион еуроға (33 миллиард теңгеден астам) жететінін мәлімдеді.

Жекелей сындағы жеңімпаздар 2,8 миллион еуро (1,52 миллиард теңге), ал финалистер 1,4 миллион еуро (760,4 миллион теңге) алады.

Алайда көптеген теннисші бұл соманы жеткіліксіз деп санаған.

Бір топ ойыншы, соның ішінде беларусьтік теннисші Арина Соболенко, ұйымдастырушыларға бағытталған сынды қолдап, ашық хатқа қол қойған.

Соболенко теннисшілерге төленетін ақы айтарлықтай көтерілмесе, турнирге бойкот жариялауға дайын екенін ашық айтқан.

Қазақстандық әлемнің екінші ракеткасы Елена Рыбакинадан Италия ашық чемпионатының баспасөз мәслихатында бойкот бастамасын қолдайтын-қолдамайтыны сұралды.

Теннисші егер спортшылардың көпшілігі қатысса, өзінің де қосылатынын айтты.

"Бұл күрделі мәселе. Бұған дейін де ойыншылардың бірігіп, бойкот жариялауына болатын жағдайлар көп болған, бірақ ол ешқашан жүзеге асқан емес. Шыны керек, білмеймін. Егер көпшілік бойкот жариялаймыз және ойнамаймыз десе, әрине, мен де қосыламын. Бұл қиындық тудырмайды", - деп жауап берді Рыбакина.

Дегенмен ол мәселе тек сыйақы мөлшерінде ғана емес, теннисшілердің сол ақшадан төлейтін орасан зор салықтарында деп санайды.

"Бірақ өзгерістер тек "Дулыға" турнирлерінде және тек сыйақы тұрғысынан ғана емес, басқа да бағыттарда қажет деп есептеймін. Көпшілік біздің өте жоғары салықтарымыз туралы біле бермейді. Көбірек табыс тапсаң да, оның үлкен бөлігі салыққа кетеді.

Бұл бөлек тақырып. Бойкот туралы айту қиын: айтып өткенімдей, осы жылдар ішінде мәселе көп болды, бірақ ойыншылар әлі күнге дейін бірдеңені өзгерту үшін шынайы түрде біріккен емес", - деп толықтырды теннисші.

Айта кетейік, Елена Рыбакина өзінің спорттық мансабында турнирлерден 28,49 миллион доллар (13,2 миллиард теңге) көлемінде сыйақы алған.

Оның еншісінде Үлкен дулыға турнирлерінің 2 жеңісі бар (Уимблдон-2022 және Australian Open-2026).

Арина Соболенко өз кезегінде мансабында 49,19 миллион доллар (22,8 миллиард теңге) табыс тапқан. Беларусьтік спортшының қоржынында Үлкен дулыға турнирлерінің 4 трофейі бар - 2 Australian Open (2023, 2024) және 2 US Open (2024, 2025).