Нұрсұлтановтың WBC титулы үшін жекпе-жегін Қазақстан телеарналары көрсетпейді

Фото: instagram.com/meiirim.nursultanov/

Қазақстандық боксшы Мейірім Нұрсұлтанов 20 қыркүйекке қараған түні орта салмақтағы WBC уақытша белбеуі үшін америкалық кіші Хесус Рамоспен жекпе-жек өткізеді. Қазақстандық арналар бұл кездесуді тікелей эфирде көрсетпейтіні белгілі болды, - деп хабарлайды Tengri Sport.

Нұрсұлтанов пен кіші Рамос арасындағы жекпе-жектің Қазақстанда көрсетілмейтіні туралы ақпарат әлеуметтік желілерде тарады. Tengri Sport боксшының командасымен байланысқа шығып, трансляцияны бірнеше қазақстандық арнаға ұсынғанымен, нәтижесінде көрсетілім бойынша келісімге келу мүмкін болмағанын анықтады.

Нұрсұлтановтың командасы біздің сауалымызға қазақстандық арналар жекпе-жекті көрсету туралы келіссөздерден бас тартқанын айтты.

Нәтижесінде бұл жекпе-жекті тек шетелдік арналардан бөлек ақылы көруге болады.

Сонымен қатар, Qazsport дирекциясы мәселе құқық иеленуші тарапта екенін мәлімдеді.

"Бұл жекпе-жектің құқығы DAZN платформасына тиесілі, біз сұрастырдық, олар телеқұқықтарды сатпайтынын айтты", - деді арна директоры Нағи Бақытеков тілшімізбен әңгіме барысында.

Осылайша, Қазақстанда жекпе-жекті тек құқық иеленушінің ресми сайтынан көруге болады. Бокс кешін трансляциялау құқығы DAZN-ге тиесілі.

Алдын ала кесте бойынша, Нұрсұлтановтың жекпе-жегі Қазақстан уақытымен 20 қыркүйек күні таңғы сағат 7:00-ден кейін басталуы тиіс.

Рамосқа қарсы жекпе-жек - оның мансабындағы ең маңыздысы және қазақстандық бокстағы "жыл жекпе-жегі" болуы мүмкін

Еске салайық, қазақстандық боксшы рингке үш жылға жуық үзілістен кейін оралады. Соңғы рет ол 2023 жылдың қарашасында жұдырықтасып, чилилік Хулио Аламосты төрешілердің бірауыздан шығарған шешімімен жеңген болатын.

Нұрсұлтановтың еншісінде барлығы 20 қатар жеңіс бар және ол бірде-бір рет жеңілмеген.

Instagram-дағы бұл жарияланымды көру

ADAL PROMOTIONS (@adal_promotions) жарияланымы

Айта кетейік, қазіргі уақытта Қазақстанда кәсіпқой бокстан бірде-бір әлем чемпионы жоқ, сонымен қатар тек Мейірім ғана титулға жақын тұр.

Экс-әлем чемпионы Жәнібек Әлімханұлы жазда орта салмақтағы WBO белбеуінен бас тартты, қазір ол тек жаңа салмақ дәрежесіндегі титулдық жекпе-жек бойынша келіссөздер жүргізіп жатыр.

Instagram-дағы бұл жарияланымды көру

JANIBEK | QAZAQ STYLE (@janibek_alimkhanuly) жарияланымы

Тағы бір үздік қазақстандық боксшы - Сұлтан Зәуірбек - 26 қыркүйекте жартылай жеңіл салмақта IBF желісі бойынша міндетті үміткер атағы үшін жекпе-жек өткізуі тиіс және тек жеңіске жеткен жағдайда ғана титулдық айқасқа мүмкіндік алады.