Париждегі Паралимпиада чемпионы Қазақстанға Азиаданың екінші алтынын сыйлады

Фото: instagram.com/kazparalympics/

Қазақстандық парапауэрлифтер Давид Дегтярев Жапониядағы Азия ойындарында рекорд орнатып, алтын медаль иеленді, деп хабарлайды Tengri Sport.

30 жастағы атлет 54 келіге дейінгі салмақ дәрежесінде жеңіске жетті. Ол өз салмағынан төрт есеге жуық ауыр жүкті - 191 келіні көтерді.

Бұл көрсеткіш - Дегтяревтің өткен жылы орнатқан Азия рекордының қайталануы және Азия пара ойындарының жаңа рекорды.

Парапауэрлифтердің алтыны Қазақстан құрамасы үшін Азия пара ойындарындағы бүгінгі екінші жүлде болды - бұған дейін мерген Еркін Ғаббасов жеңіске жеткен болатын.

Давид Дегтярев деген кім?

Қазақстандық параспортшы ел тарихындағы тұңғыш екі дүркін Паралимпиада чемпионы ретінде есімін қалдырды. Оның еншісінде Токио (2021) және Париж (2024) ойындарының алтыны бар. Сонымен қатар ол өз нәтижелерін үнемі жақсартып келеді: алғашқы алтынын 174 келімен, екіншісін 188 келімен ұтса, енді Азия ойындарында 191 келіні бағындырды.

Бұл - Дегтяревтің Азия пара ойындарындағы үшінші медалі: ол 2018 жылы күміс, ал 2023 жылы алтын иеленген болатын.